Almaty ákimdiginiń Qoǵamdyq damý basqarmasy jáne О́ńirlik kommýnıkasııalar qyzmetiniń uıymdastyrýymen jarııalanǵan baıqaý qorjynyna 70-ten astam materıal kelip túsken. Qazylar alqasy úzdik jumystaryn qarap, jýrnalıster men blogerler arasynan 10 jeńimpazdy tańdady.
Dástúrli is-sharaǵa aınalǵan shyǵarmashylyq baıqaýǵa qala ómirine qatysty materıaldar jýrnalıster, fototilshiler, beıneoperatorlar, blogerlerden kelip túsken. Úmitkerler arasynda ınternet-resýrstaǵy «Almaty ómiri týraly úzdik longrıd» atalymy úlken qyzyǵýshylyq týdyrdy. Taqyrypqa oraı, ásirese fotograftardan kóptegen jumys kelip túsken.
Almaty qalalyq Qoǵamdyq damý basqarmasy basshysynyń orynbasary Renat Bekbergenov jýrnalıster jumysynyń mańyzdylyǵyn atap ótip, qalanyń damý barysyna qatysty materıaldar daıyndap, jarııalaýǵa erekshe kóńil bólgen buqaralyq aqparat quraldary ókilderine alǵysyn bildirdi. Renat Bekbergenovtiń aıtýynsha, baıqaý qorjynyna túsken barlyq jumys nazar aýdararlyqtaı. Ol jeńimpazdardy kele jatqan Qala kúnimen quttyqtap, qoǵamdaǵy jaýapkershiligi joǵary isti atqaryp júrgen qalam ıelerine shyǵarmashylyq sáttilik tiledi.
Baıqaý qorytyndysynan málim bolǵanyndaı respýblıkalyq «Egemen Qazaqstan» gazetiniń tilshisi Arman Oktıabrdiń maqalasy «Almaty ómiri týraly úzdik avtorlyq jarııalanym» dep tanyldy.
Jeńimpazdarǵa uıymdastyrýshylar taǵaıyndaǵan arnaıy syılyqtar tabys etildi.
ALMATY
