Serbterdiń sesi basym

60 kılo salmaqta synǵa túsken 26 jastaǵy qandasymyz alǵashqy aınalymdarda rýmynııalyq Aleksandrý Trandafır (9:0) men armenııalyq Gevorg Sharıbaıandy (3:0) shań qaptyryp, shırek fınalda qytaılyq Lýgıo Kaony (7:1) oısyrata utqanda, «Áp, bárekeldi!» dep alaqanymyzdy ysqylaǵan edik. Biraq jartylaı fınalda Aıdos bilgeninen jańyldy. Bul mejede ol 23 jas­taǵy álem chempıonatynyń eki dúrkin kúmis júldegeri, Álem ký­bogynyń ıegeri, Azııa chempıo­ny Jolaman Sharshenbekovpen kúsh synasty. Qyrǵyz balýanynan bizdiń jigit osyǵan deıin úsh ret utylǵan bolatyn. Sonyń áseri boldy ma, áıteýir, osy joly Sultanbekti biz múlde ta­ny­madyq. Jolaman ony ári de, beri de laqtyryp, 7:0 esebimen jeńiske jetti. Al Aıdos endi qola medal úshin talasady.

Asa aýyr salmaqtaǵy Álim­han Syzdyqovtyń da jeńis tuǵy­ryna kóterilýine múmkindigi bar. Bastapqy básekede ol ıran­dyq Ámir Mırzazadeden (0:5) utylǵanyna qaramastan, juba­nysh beldesýlerde baq synaıdy. Sebebi Parsy eliniń alyby aqtyq synǵa alqynbaı jetti. Endi aldaǵy básekelerde Álimhan baryn salady dep úmittenemiz.

Al jarys jeńimpazy men júldegerleri jaıynda aıtar bolsaq, búgin de Serbııa qura­masy eki altyn medal oljalap, jergilikti jankúıerlerdi qýanysh pen shattyqqa bóledi. Atap aıtsaq, 63 kılo salmaqta Se­bastıan Nadtyń asyǵy alshysynan tústi. Fınalda ol álem chempıonatynyń kúmis júl­degeri, Eýropa chempıony grý­zııalyq Lerı Abýladzeni utty. 67 kılo salmaq dárejesinde Mate Nemesh dara shyqty. Bul sportshy Olımpıada, álem jáne Azııa chempıony, ırandyq Mohammadreza Geraıdan aılasyn asyrdy. 82 kılo salmaqta Túrkııanyń tarlany Býrhan Aqbýdaqtyń asyǵy al­shysynan tústi. Fınalda ol ózbekstandyq Jalǵasbaı Berdi­muratovtan basym tústi. 97 kılo salmaq dárejesinde Olımpııa oıyndarynyń tolyq júlde jıyntyǵynyń ıegeri, álemniń tórt jáne Eýropanyń bes dúrkin chempıony armenııalyq Artýr Aleksanıanǵa teń keler eshkim ta­byl­mady. Fınalda Artýr bol­ga­rııalyq Kırıll Mıolovty jeńdi.