Jarystyń bastalýyna birneshe kún qalǵanda Tumandy Albıon eline jetken Qazaqstannyń ulttyq quramasy birden daıyndyqqa kiristi. Sol kezde BAQ ókilderine bergen suhbatynda komandamyzdyń eń tájirıbeli oıynshysy Mıhaıl Kýkýshkın: «Dál qazir qaı eldiń órenderi kelesi kezeńge shyǵatynyn dóp basyp aıtý qıyn. Barlyq komandanyń sapynda óte myqty jáne tájirıbeli tennısshiler bar. Olar jekelegen básekelermen qatar, juptyq saıystarda da jaqsy oıyn kórsete alady. Al bizdiń bir artyqshylyǵymyz – Devıs kýbogynda jıi baq synaı júrip, mol tájirıbe jınadyq. Atalǵan dodada nebir azýly quramalardy jolymyzdan yǵystyryp, komandalyq rýhymyzdyń myqty ekenin san márte dáleldedik. Bul joly da jankúıerlerimizdi jerge qaratpaýǵa barynsha kúsh salamyz», dedi.
Keshe 8 myń kórermendi syıdyra alatyn Emirates Arena kesheninde Qazaqstan quramasy tusaýkeser kezdesýin Nıderlandtyń tennısshilerimen ótkizdi. Erteń AQSh-pen aıqasamyz. 18 qyrkúıekte Ulybrıtanııamen kúsh synasamyz. Al ózge básekeler Italııanyń Bolonıa, Ispanııanyń Valensııa jáne Germanııanyń Gambýrg qalalarynda ótýde. Ár toptyń úzdik eki komandasy pleı-offqa joldama alady. Sheshýshi básekeler 23-27 qarasha kúnderi Pıreneı túbegindegi Malaga qalasynda uıymdastyrylady. Sol týrnırde Devıs kýbogynyń jeńimpazy anyqtalady.
