Aýyldyq jerde mal sany artqan saıyn jer daýy jıileı bastady. Jaıylymnyń tarlyǵy, shabyndyqtyń joqtyǵy – kún tártibinen túspeıtin másele. Joldaýda Prezıdent jer máselesine nazar aýdardy. Álbette, ıgerilmeı bos jatqan jerlerdi memleket menshigine qaıtaryp, sharýashylyqpen shyndap aınalysyp júrgen azamattarǵa úlestirip berý qajet. Áıtpese, on sıyry bar azamat jer tappaı júredi de, bir tuıaq maly joq azamat júzdegen gektardy ıelenip otyrady. Memleket basshysy jyl sońyna deıin 5 mln gektar jerdi qaıtarý kerektigin aıtty. Ol úshin jergilikti jerlerdegi komıssııa jumys isteýge tıis.
Sondaı-aq Prezıdent jol qurylysyndaǵy sapasyzdyqty synǵa aldy. Basqany bilmeımin, Shyǵys Qazaqstannyń joldary ábden tozǵan. Salynyp jatqan Omby-Maıqapshaǵaı kúre joly saǵyzdaı sozylyp ketti. Joldaýdan keıin jol jóndeler dep bir túıip qoıdyq. Mańyzdy qujatta bıtýmnyń tapshylyǵy da sóz boldy. Kádimgi bıtým máselesin Memleket basshysy Joldaýyna qosyp otyrǵan soń jergilikti jerdegi ákimderden ne suraımyz?!
Joldaýda aýyl sharýashylyǵyna da nazar aýdaryldy. Prezıdent sýbsıdııa alǵandarǵa baqylaý kúsheıtilý kerek dep qosty. Ras, sýbsıdııany alýyn alyp, eńbeginen nátıje kórsetpeı otyrǵan sharýalar joq emes.
Áıelderdiń zeınet jasynyń 2028 jyly 61 jasqa deıin túsetinin aıtyp qýantty, balalarǵa qor ashylatynyn aıtyp taǵy qýantty. Bilim salasynda da jaqsy jańalyqtar bolatyn kórinedi. Bárine toqtalmaı-aq qoıaıyn, biraq tárbıeshilerdiń jalaqysy kóterilip, attestasııadan ótetindigi týraly dóp basyp aıtty. Ras, jalaqyny kóterý kerek. Biraq bala tárbıesine bilimdi, bilikti tárbıeshi kerek. Ol úshin mindetti túrde synaqtan ótýi tıis. Áıtpese, balabaqshalarda beınekameraǵa túsip qalǵan tárbıeshilerdiń tárbıesizdigin kórý sońǵy kezde jıilep ketkeni eshkimge jasyryn emes.
Joldaýda jańalyq kóp. Endi onyń bári júzege asýy úshin bizder jumys isteýimiz kerek. Joldaýdy júzege asyratyn ózimiz. Sózden iske kóshý kerek.
Ádil SAILAÝBEK,
qoǵam belsendisi, saıasattanýshy
Shyǵys Qazaqstan oblysy
