Prezıdent «Azamattardyń suranysyna sáıkes ondaǵan abattandyrý jobalary júzege asyryldy», dep ózin-ózi basqarýdyń keıbir qadamdaryna qanaǵat bildirdi. Osyndaı jumystardyń shyǵyny aýdandar men aýyldyq okrýg bıýdjetterine engizilse, mundaı jobalar jalǵasyn taba berer edi jáne júıeli túrde júrgiziler edi. Sonda aýyldarymyz jaınap, qandastarymyzdyń kóshi-qonyn arttyrýǵa óziniń yqpaldy úlesin qosa berer edi. Qoǵamdyq keńester men aýyl belsendileriniń ótinishteri eskerilip, aýylishilik joldardy jóndeý, kórnekti jerlerdi abattandyrý sekildi jumystardyń shyǵyny bıýdjetke engizilgennen keıin olardyń sapaly oryndalýyn baqylaý osy uıymdarǵa arnaýly tártippen júktelse, nur ústine nur bolar edi.
Joldaýda jastardyń jumysshy mamandyqtaryn alý máselesi de aıtylyp, Úkimettiń osy máselege nazar aýdarýy tapsyryldy. Áıtpese jyl saıyn mektep bitirgen myńdaǵan jasóspirim jumysqa tura almaı, mamandyq ala almaı jumyssyzdar qataryn toltyrady. Prezıdent sol máselege nazar aýdaryp, olardyń aldyn ala josparlanyp, sheshilip otyrǵany durys bolar edi degen pikirin de óte durys dep sanaımyn.
Infografıkany jasaǵan Amangeldi Qııas, «EQ»
Joldaýda halyqqa qýanyshty habarlar da jetkizildi. Ásirese 18 jasqa deıingi balalardyń árqaısyna esepshot ashylyp, oǵan memleket tarapynan arnaýly jarna salynyp otyratyny óte úlken qýanysh. Damyǵan arab elderinde, munaıly memleketterde mundaı tájirıbe baıaǵydan bar, sony bizdiń memleket kesheýildetip kelgen edi, endi sol iske asatyn bolypty. Bul ásirese kópbalaly otbasylar úshin úlken qýanysh. Ári bala týýdy yntalandyrýǵa da kómektesetin yqpaldy sheshim. Elimizdegi halyq sanynyń ósýi ózekti máseleniń biri ekeni daýsyz, endi sol eptep sheshiletin bolar degen úmit oıandy.
Áıelderdiń zeınet jasynyń 61-ge deıin azaıtylýy da «Halyq únine qulaq asatyn memleket» tujyrymdamasyn aqtaıtyn sheshim bolyp otyr. Qazir jasy 60-qa taıanǵan adamdardy eshqandaı mekeme-uıymdar, kásiporyndar jumysqa alǵysy kelmeıdi. Burynnan istep kele jatqandardy túrli sebeptermen, sonyń ishinde IT tehnologııany erkin ıgere almaǵandyǵyn sebep qylyp, jumystan qysqartýǵa tyrysady. Mine, osy adamdardyń jumyssyz qınalyp júrgeni júrekti aýyrtatyn edi. Endi tym bolmasa áıelder qaýymy 61-de zeınetke ilegetin boldy, oǵan da shúkir deımiz. Degenmen osy máseleni áli de tereńirek zerttep, jeńildikti ulǵaıta tússe – artyq bolmas edi. Jalpy, bıylǵy Joldaý elimizge, halqymyzǵa jaqsy jańalyqtar ákeldi dep sanaımyn.
Janat MUHAMEDJANOV,
«Soltústik Qazaqstan oblysy Azamattyq Alıansy» ZTU jáne «Qazaq tili» qoǵamynyń tóraǵasy
