– Biz balalar alańyn ashýǵa qarjy jınaýdy qolǵa alǵan edik. Qaıyrymdy jandardyń kómegimen 65 mln teńge jınaldy. Al Atyraý qalalyq ákimdigi Geolog shaǵyn aýdanynan jer telimin bólýge kómektesti. Bul jobany eki aı ishinde júzege asyrdyq. Osylaısha, Balalar jylyna óz úlesimizdi qosýdy, balalarǵa syı jasaýdy jón kórdik, – deıdi eriktiniń biri Vladımır Kım.
Onyń aıtýynsha, balalardyń oıyn alańyn ashatyn oryn kezdeısoq tańdalǵan joq. Qalanyń ár shaǵyn aýdanyndaǵy turǵyndar, onyń ishinde balalar sanyna zertteý júrgizildi. Buǵan jergilikti ákimdiktiń ókilderi de qatysty. Eriktiler dronmen áýeden barlaý jasap, Geolog shaǵyn aýdanyna balalar alańy qajettigine kóz jetkizdi.
– Bul – bizdiń balalarymyz úshin keremet syı. Buryn balalarymyzdyń qaýipsizdigine alańdaýshy edik. Endi balalarymyz bos ýaqytyn oıyn alańynda ótkizetinine qýanyp otyrmyz. Ásirese balalarymyzdyń qýanyshynda shek joq, – deıdi Geolog shaǵyn aýdanynyń turǵyny Kákıma Omarova.
Al eriktiler mundaı jobany jalǵastyrýdy kózdep otyr.
Atyraý oblysy
