Alys saparǵa shyqqanda kir jýyp, kindik kesken shoq juldyzdaı shaǵyn ǵana Tassýattyń kókiregin qolamtanyń shoǵyndaı qyzdyryp júretini bar. Kúsh beredi, qýat darytady. Alapat saǵynysh jan dúnıesin meńdegen saıyn alyp-ushyp asyǵatyny bar. Týǵan jer degen ystyq qoı, shirkin! Osy aýylda týyp-ósti, balaýsa armany da búr jardy. Balań kóńil qashanda shetsiz, sheksiz qııalshyl edi. Biraq sportshy bolamyn dep áste oılaǵan joq. Bári 2017 jyly bastalǵan. Sol jyly záýi bir sebeppen aıaǵynan aıyrylyp qalǵany. Otadan keıin bar dúnıe kúńgirt tartyp, bolashaqtan kúder úzgendeı bolǵanyn da jasyra almaıdy. Kúnderdiń bir kúninde tirshiliktiń arnasyn ózgertkisi kelgen. Qos qaqpanyń arasynan jol tappaı, abdyrap qalǵan arý bul ómirdiń kúres ekenin uqqan. Qıyndyqpen kúrese bilgender ǵana juldyzyn jandyrmaq. Endeshe, borkemik bolǵan durys emes. Sóıtip, sportpen aınalysa bastady. Onda da ıadro, naıza, dısk laqtyrýmen. Álgi zattardy laqtyrǵanda, ıyǵynan basqan, tula boıyn janyshtap jerge tyǵyp jibergisi kelip turǵan tirshiliktiń taýqymetimen. Boıyna bar kúshin jınap, serippedeı shıyrylyp laqtyrǵanda, quddy bir naızany emes, ómirdiń qıyndyǵyn, peshenesine jazylǵan synaqtyń salmaǵyn laqtyrǵandaı órshelenetin. Az ýaqyttyń ishinde ádis-tásilin meńgerip aldy. Tabıǵat syılaǵan qýat ta arnasynan asyp-tasyp jatqandaı.
– О́mirde ne bolmaıdy?! – deıdi Ásem Janádilova, – adam eshqashan qıyndyqqa moıynsunyp, unjyrǵasy túspeýi kerek. Biz mynaý jarqyn ómirden sybaǵamyzdy kúresip júrip alamyz. Jalpy, taǵdyr ór minezdi, qaısar adamdardy unatady. Al sport jigerińdi janıtyn, ómirge degen qushtarlyǵyńdy arttyratyn, tula boıyńa shymshymdap kúsh-qýat darytatyn aıryqsha óner. Osy sport arqyly dám buıyrǵan talaı jerge baryp, jarystarǵa qatysyp júrmin. Esh kemdigi joq. Tipti boıymdaǵy ókinish tarap, ózim tárizdi adamdardy eshteńeden túńilmeýge, qaıta qaırattanýǵa shaqyryp júremin.
Alǵashqy aılar qıyn ótken. Degenmen, úmit lebi, kókirektegi ádemi arman bárin jeńedi eken. Oblystyq jarystarda júldege ıe bolyp júrdi. Oblystyq «Úmit» spartakıadasynda top jardy. Atyraý qalasynda ótken ıadro laqtyrýdan birinshi, dısk laqtyrýdan birinshi, naıza laqtyrýdan ekinshi orynǵa ıe bolyp, sport sheberi atandy. Bıyl Almaty qalasynda uıymdastyrylǵan respýblıkalyq jarysta taǵy da top jarǵanynda jattyqtyrýshysy Danııar Bektemisovtiń qýanyshynda shek bolǵan joq.
Endi, mine, Afrıka qurlyǵynyń Marokko qalasynda ótetin álemdik jarysqa attanyp barady. Úıinde qalǵan uly men qyzyna azdap alańdaǵany bolmasa, kóńilde esh kúdik joq. Qos perzentin tańǵy shyqtaı móldiregen analyq aq mahabbatymen aıalap, Jaqsynyń jalpaq dalasynda kóktemde ósetin qyzǵaldaqtaı qulpyrtyp, ósirip keledi. Olardyń boıyna da emenniń ıir butaǵyndaı qaısarlyq dánin sińirýde.
– Aldyn kim boljap bilgen? – deıdi keıipkerimiz, – baıaǵyda Tassýattaǵy atalarymyz ben ájelermiz «keler kúnnen kúderińdi úzbe» dep aqyldaryn aıtyp otyratyn. Darqan dalanyń danyshpany – sol adamdardyń jol silteýimen óstik emes pe? Endi biz de keıingige ómirden túıgenimizdi aıtamyz. Aıtý az, óz isińmen ónege bolǵan jón. О́z basym osyndaı jarystarda jeńiske jetken saıyn múmkindigi shekteýli jandarǵa ónegeli úlgi bolady dep esepteımin.
Aqmola oblysy,
Jarqaıyń aýdany
