Álemdik saıasatty basqaratyndar bul týraly oılanyp, janashyrlyq tanytýǵa tıis dep sanaımyn. Din kóshbasshylary óz kezeginde qaqtyǵystar men soǵystardy aldyn alý úshin úndeýler men ýaǵyzdar arqyly beıbitshilik pen ózara qurmetke negizdelgen qoǵam qalyptastyrýǵa kúsh-jigerlerin jumsaý qajet. Qasıetti Quran Kárimde aıtylǵandaı «Alla Taǵala jer betinde tártip ornatty, sender onda zulymdyq jasamańdar». Qasıetti kitapta «Barlyq din adamzatqa, qorshaǵan ortaǵa degen súıispenshilik pen qurmet rýhyn oıatady», delingen sondaı-aq onda apat, daǵdarys pen synaqtar týraly eskertý bar.
Biz bastan keshken gýmanıtarlyq daǵdarystar – qaqtyǵystar men soǵystardyń saldary. Máselen, Ázerbaıjan 30 jyldyq okkýpasııany aıaqtap, álemdik qaýymdastyq moıyndaǵan aýmaqtyq tutastyǵyn qalpyna keltirgennen keıin Qarabaqty jaýlap alý kezinde jerleri órtenip, sý qoımalary lastandy. Vandalızm, zorlyq-zombylyq áreketterimen mádenı jáne rýhanı muralary joıyldy, sansyz jarylǵan mınalar qazir halyqtyń ata-babalarynyń jerlerine qaıta oralýǵa kedergi keltirip otyr.
Qazirgi álemniń qaýip-qaterlerin aldyn alýǵa jáne qoǵamnyń máselelerin sheshýde memlekettik, qoǵamdyq jáne dinı qaıratkerlerdiń yntymaqtastyǵy arqasynda naqty nátıjelerge qol jetkizýge bolatynyn senimmen aıtamyn. Ázerbaıjan halqynyń atynan baýyrlas Qazaqstannyń basshysyna osyndaı pikir almasýǵa múmkindik týǵyzǵany, mańyzdy is-sharany joǵary deńgeıde uıymdastyrǵany, qonaqjaılylyq tanytqany úshin zor alǵysymdy bildiremin. Baýyrlastyq rýhyndaǵy kezdesýimiz beıbitshilikke, ádilettilikke, rýhanı damýǵa jáne adamzattyń ortaq múddelerine qyzmet etedi dep senemin.
Sheıh Ýl-Islam Allahshúkir PAShA-ZADE,
Kavkaz musylmandar basqarmasynyń tóraǵasy
