Tilderdi damytý jáne muraǵat isteri basqarmasynyń basshysy Sáken Esirkep jınalǵandardy áleýmettik jelide, qoǵamda kópten beri talqylanyp júrgen, depýtattar biraýyzdan maquldaǵan usynysty qoldaýǵa shaqyrdy.
Osy oraıda Nur-Sultan qalalyq Qoǵamdyq keńesiniń músheleri Marat Mustafın, Kárimbek Qurmanalıev te elordaǵa eski ataýdy qaıtarýdy qoldaıtynyn bildirdi.
Q.Qurmanalıevtiń aıtýynsha, ol ǵalym retinde qatysqan sheteldegi halyqaralyq forýmdarǵa qatysýshylardyń kóbi Astana ataýymen tanys bolǵan.
Bul máselege baılanysty Memleket tarıhy ınstıtýty dırektorynyń orynbasary Búrkitbaı Aıaǵan da óz pikirin bildirdi.
«Memlekettiń damýyndaǵy Tuńǵysh Prezıdent Nursultan Nazarbaevtyń róli zor boldy. Tuńǵysh Prezıdentke alǵysymyz sheksiz, biraq qala ataýyn ózgertý sheshimi bálkim, asyǵys bolǵan shyǵar. Onomastıkalyq komıssııa Astananyń atyn qaıtarý týraly usynysymyzdy jan-jaqty qarastyryp, talapqa kóbirek sáıkes keledi dep eseptedi. Eń bastysy, qoǵamdy biriktirýge múmkindik beredi», deıdi ol.
Al, Elorda máslıhatynyń hatshysy Erlan Qanalımov elorda ataýyn ózgertý prosedýrasy birneshe kezeńnen ótýi kerektigin atap ótti.
«Bizdiń otyrystarymyzdan soń respýblıkalyq onomastıkalyq komıssııada osy máselege baılanysty jıyndar bolady. Osydan keıin qujattar Úkimetke joldanady. Úkimet jarlyq jobasyn Prezıdenttiń qol qoıýyna usynady. Eger Jarlyqqa qol qoıylsa, ol resmı jarııalanǵannan keıin, elorda ataýy ózgertiledi dep aıtýǵa bolady», dedi E.Kanalımov.
