«Halyq birligi jáne júıeli reformalar – el órkendeýiniń berik negizi» dep atalatyn Joldaýynda Prezıdent Qasym-Jomart Toqaev: «Menińshe, memleket basshysynyń baǵdaryna kúmán keltiretinder, jumys isteý qolynan kelmeıtinder, ebin taýyp ornynda otyra berýdi qalaıtyndar, Prezıdent tapsyrmalaryn oryndaýdan jaltaratyndar qyzmetten ketýge tıis», degen bolatyn. Mine, bul mindetterdi men qashanda qadir-qasıetteri joǵary, árdaıym óz dárejesin bıik ustap tura alatyn tuǵyrly tapsyrma dep uǵynamyn. Demek bul mindetterdiń mańyzdylyǵy barǵan saıyn arta túspese, tómendemese kerek.
Sol sııaqty odan keıingi: «Ádiletti Qazaqstan: Jańarý men jańǵyrý joly» atty Joldaýynda atap kórsetilgen: «Buqaralyq aqparat quraldary bılik pen halyqtyń arasyndaǵy tıimdi baılanys arnasy bola otyryp, eldegi qordalanǵan máselelerdi kótere alady jáne kóterýge mindetti. Biraq muny joǵary azamattyq jaýapkershilikpen jasaý kerek» degen sózder, ol qaı kezeńde aıtylsa da, óz ómirsheńdigin joǵaltpaıdy. Mundaǵy «Joǵary azamattyq jaýapkershilik» degen sózge biz jete mán bere qaraýymyz kerek. Árıne, bul – bile-bilsek úlken sabaq, qalamymyz ben baǵyt-baǵdarymyzǵa siltenip otyrǵan sara jol. Biraq bul tıimdi baılanys arnasyn tek buqaralyq aqparat quraldary ǵana emes, sonymen birge, bılikte otyrǵandar da jete túsinip, jazylǵan synnan tıisti qorytyndy shyǵaryp otyrsa óz nátıjesin bermek. Eń bastysy, Joldaýda aıtylǵan basymdyqtardy talqylaý emes, ony oryndap, júzege asyra bilý mańyzdy.
Buǵan deıingi jáne jańa Joldaýda aıtylǵan ózekti máselelerdi ózara ushtastyra otyryp, joǵary jaýapkershilik turǵysynan oryndaýǵa kúsh-jiger jumsaı bilý búgingi kúnniń basty mindeti bolýy shart dep esepteımin. Iаǵnı biz Joldaýǵa qalaı úles qosyp jatqanymyzdy qaǵazbastylyqpen, nemese tek tilimizdiń ushynda ǵana úıirip ustaýmen emes, iskerligimizben aıǵaqtaı túsýge tıispiz.
Serikbaı TURJAN,
Qazaqstannyń qurmetti jýrnalısi
Túrkistan oblysy,
Báıdibek aýdany
