«Samuryq-Energo» AQ habarlaýynsha, jobanyń jalpy quny – 37,4 mlrd teńge. Jańa stansa árbir nomınal qýaty 2,5 MVt bolatyn 24 jel energetıkalyq qondyrǵysynan turady. Budan bólek, oǵan qosalqy stansa, soǵan sáıkes ınfraqurylym salynyp, sondaı-aq áýe elektr jetkizý jelileri tartylǵan. Stansada álemdik jel týrbınalaryn óndiretin jetekshi kompanııalardyń biri – GoldWind kompanııasynyń jabdyqtary paıdalanylǵan.
Jańa jel elektr stansasy jylyna 225,7 mln kVt/saǵat elektr energııasyn óndirmek. О́ndiristik sıpattamalarynan bólek, joba óziniń ekologııalyq qurylymy turǵysynan da óńir úshin mańyzdy. Elektr stansasyn salý jáne ony iske qosý parnıktik gazdar shyǵaryndylaryn 206 myń tonnaǵa deıin azaıtýǵa múmkindik beredi. Sondaı-aq jylyna shamamen 89 myń tonna dástúrli otynnyń ornyna júretin bolady.
Jobany «Samuryq-Energo» AQ qazaqstandyq elektr energetıkalyq holdıngi Power China qytaı korporasııasymen birlese iske asyrdy. Bul energetıka salasyndaǵy halyqaralyq yntymaqtastyqtyń tabysty úlgisi bolyp sanalady.
Jel elektr stansasyn iske qosýǵa arnalǵan is-shara aıasynda «Samuryq-Qazyna» AQ men Power Construction Corporation of China Ltd arasynda yntymaqtastyq týraly memorandýmǵa qol qoıyldy. Qujat stansany keńeıtý jáne onyń qýatyn 300 MVt-qa deıin arttyrý arqyly jobanyń ekinshi kezeńin iske asyrýdy kózdeıdi.
Jańa energetıkalyq nysandy salý kezinde 300 adam jumyspen qamtylǵan. Stansany odan ári paıdalaný úshin 14 maman daıarlanyp, jumysqa ornalastyryldy.
«Samuryq-Energo» sarapshylarynyń aıtýynsha, Almaty qalasy men Almaty oblysynda qazirgi kúni jumys istep turǵan energetıkalyq qýattarǵa (Almaty JEO, Qapshaǵaı jáne Almaty GES kaskady, Jambyl GRES, sondaı-aq Esik, Moınaq, Qaratal, Taldyqorǵan GES-teri) qaramastan, bul óńirde energııa tapshylyǵy bar ári munda otyn resýrstary jetkilikti deńgeıde emes. О́ndirýshi qýattardyń jetispeýshiliginen oblystyń elektr energııasyna degen muqtajdyǵyn oblystyń energııa kózderi 50 paıyzǵa ǵana óteıdi. Tapshylyq syrtqy energııa óndirýshiler (respýblıkanyń soltústik oblystarynan, Jambyl GRES-i jáne Qyrǵyzstannan) esebinen jabylady.
«Samuryq-Energo» AQ Basqarma tóraǵasynyń mindetin atqarýshy Serik Túıtebaevtyń aıtýynsha, kompanııa jańǵyrmaly energetıkany damytýǵa erekshe kóńil bóledi. Energetıkalyq holdıngte búginde 5 jańǵyrmaly energııa kózderi nysany jumys isteıdi – kún, jel elektr stansalary, shaǵyn sý elektr stansalary. Atalǵan jańǵyrmaly energııa kózderi nysandarynyń elektr energııasyn óndirýi 2022 jylǵy qańtar-shildede 206,6 mln kVt/satty quraǵan. Bul 2021 jyldyń sáıkes kezeńimen salystyrǵanda 8,9 paıyzǵa joǵary.
– Almaty oblysynda «jasyl» elektr energııasyn óndirý úshin kóptegen tabıǵı múmkindik bar. Kún men jeldiń áleýetinen basqa, «Samuryq-Energo» gıdroenergetıkany damytýǵa erekshe kóńil bóledi. Buǵan Moınaq GES-in salý jáne Shardara GES-in jańǵyrtý jónindegi aıaqtalǵan jobalar dálel bola alady. Kompanııanyń portfelinde jańa sý elektr stansalaryn salý boıynsha birqatar joba bar. Atap aıtqanda, Ile ózeninde Qapshaǵaı GES-iniń apta saıynǵy birkelki emes táýliktik sý jiberýlerin teńestirýge jáne stansany qolda bar barlyq qýatty paıdalana otyryp, eń joǵary júktemelerdi jabý rejimine aýystyrýǵa múmkindik beretin qýaty 40 MVt bolatyn Kerbulaq GES kontrrettegishin salý qarastyrylǵan. Sondaı-aq kompanııa Almaty oblysynyń tapshy energııa júıesine jetkizý úshin elektr energııasynyń kózin qurý maqsatynda Shelek ózeninde GES-29-dy salý boıynsha jobalaý aldyndaǵy jumystardy júrgizýde. Uzaq merzimdi perspektıvada Almaty oblysyndaǵy Al ES GES kaskadyn qaıta qurý jáne jańǵyrtý jónindegi jobany iske asyrý josparlanyp otyr. Joba qaıta qurylatyn GES-1 jáne GES-2-de elektr energııasyn óndirýdi arttyrý arqyly Úlken Almaty ózeniniń gıdrotehnıkalyq resýrstaryn tıimdi paıdalanýǵa múmkindik beredi, – deıdi S.Túıtebaev.
Energetıka mınıstrliginiń dereginshe, Qazaqstanda 2022 jylǵy shildedegi jaǵdaı boıynsha barlyǵy 142 jańǵyrmaly energııa kózderiniń nysany jumys isteıdi. Jyl basynan beri Qazaqstanda jalpy qýaty 322 MVt bolatyn 8 nysan paıdalanýǵa berilgen. 2022 jyldyń sońyna deıin jalpy qýaty 153 MVt bolatyn 13 nysandy iske qosý josparlanýda.
