Ǵasyr derti jastardy da jaǵalady

Jyl saıyn mamyrdyń úshinshi jeksenbisi JITS-tan qaıtys bolǵandardy eske alý kúni retinde atalyp ótiledi. Onyń basty maqsaty – JITS qurbandaryn eske alý, AITV/JITS-pen ómir súrip jatqan adamdarǵa, olardyń jaqyndaryna túsinistikpen qarap, qoldaý kórsetý, sonymen qatar, kim-kimniń de ómir súrý daǵdysynda tártip bolmaǵan jaǵdaıda bul aýrýdyń árbir adamǵa qatysy bolýy múmkin ekendigin eske salý, salamatty ómir saltyn qalyptastyrýǵa talpynysyn arttyrý bolyp tabylady. Oblystyq JITS ortalyǵy bas dárigeriniń orynbasary Aıbarsha Tórebaevanyń aıtýynsha, óńirde ǵasyr dertine shaldyqqan eń alǵashqy jaǵdaı 1989 jyly tirkelgen bolsa, sol ýaqyttan beri barlyǵy 295 adam anyqtalyp, AITV juqtyrǵandar sany boıynsha oblys ázirge respýblıkada on úshinshi orynda tur. Osy kezeńde 55 adam osy aýrýdan aıyqpas dertke shaldyǵyp, ómirden ozǵan. Alańdatyp otyrǵan jaǵdaı, aýrý juqtyrǵandardyń 80 paıyzǵa jýyǵynyń 20-39 jas arasyndaǵy eńbekke qabiletti jastar ekendigi bolyp otyr. Sondaı-aq, sońǵy kezde aýrýdyń taralý kóziniń birden bir sebebi, ınternet arqyly tanysýdan keıingi «qatynastar» bolyp otyrǵandyǵyn jasyrýdyń reti joq. Iаǵnı, ınternet paıdalanýshylar úshin ol bilim, oı-óris keńeıtý kózi ǵana emes, sonymen qatar, minez-qulqy jeńiltek adamdardyń aýrý juqtyrýyna da sebepshi bolýda. Oblysta JITS qurbandaryn eske alý kúnin ótkizýge medısınalyq uıymdarmen qatar, bilim berý, qylmystyq atqarý júıeleri mekemeleriniń qatysýy qalyptasqan dástúrge aınalǵan. Ortalyq keńes alamyn, tekserilemin dep tilek bildirgender úshin mamyr aıynda «Ashyq esik» kúnderin jarııalady. Ortalyq janyndaǵy «Dostyq» bólmesinde aýrý bar-joǵyna jedel testiden ótýge, qalaǵan maman dárigerdiń keńesin alýǵa tolyq múmkinshilik bar. Qazaqstan azamattary jáne oralmandar úshin AITV-ǵa tekserilý tegin, erikti jáne óz qalaýyńyzsha jasyryn túrde ótýge bolady. Aýrý juqtyrmas úshin qosymsha kúsh jumsaý nemese arnaıy bilimniń qajeti joq, salamatty ómir saltyn ustansańyz jetkilikti. Qarym-qatynas mádenıetine kóńil bólińiz, minez-qulqyńyzǵa jaýapkershilikpen qarańyz. Sonda ǵana bul qaterli derttiń aldyn alýǵa bolady, deıdi dárigerler. Satybaldy SÁÝIRBAI, «Egemen Qazaqstan». Aqtóbe oblysy.