«Atalardyń atamany» atanǵan Saýl Alvareske qarsy sharshy alańǵa úshinshi ret kóteriletin Gennadıı Golovkın meksıkalyq boksshydan aılasyn asyra alady ma? Myqty boksshylardyń jasy kelgen kezde nemese baby men baǵy taıa bastaǵan shaqta rıngke shyǵýdy ádetke aınaldyrǵan Saýl Alvares alǵashqy eki jekpe-jekte qazaq boksshysynan aýyr soqqylar aldy. Sodan da bolsa kerek, úshinshi kezdesýdi jankúıerler tórt jyl boıy taǵatsyzdana tosty. Golovkın japonııalyq Rıota Mýratany merziminen buryn jeńgenimen, ájepteýir soqqylar ótkizip alǵan edi. Sodan da bolsa kerek, Alvaresińiz qazaq oǵlanyn uryp qulatatynyna senimdi.
Alǵashqy eki shaıqas týraly aıtylatyn ańyz áńgime az emes. Birinshi kezdesýden keıin «Kanelonyń» analızinen klenbýterol tabyldy. Ruqsat etilmegen dári-dármek aǵzasyna kezdeısoq túskenin, bárine et kináli ekenin aıtyp aqtalǵan «saýyn sıyr» jazadan ońaı qutyldy. Boks uıymdary úshin de, basqalar úshin de Alvaresti uzaq merzimge jazalaý tıimsiz edi. Sonymen, sál keshigińkirep ekinshi jekpe-jek ótti. Tóreshilerdiń basym daýsymen meksıkalyq boksshy jeńiske jetti. Biraq, bul eki kezdesýde Golovkın jeńilmedi degendi jankúıerler emes, kásipqoı mamandar aıtyp jatty. Kereýettegi sarapshylardyń emes, áıgili bapker Teddı Atlastyń ózi solaı dedi.
«Qashannan beri djeb soqqysy eseptelmeıtin bolǵan. Eki shaıqasta da Gennadıı Golovkın basym tústi», dep dúrse qoıa berdi ol. Alǵashqy kezdesýde shegine júrip, reti kelgen kezde kontrpancher retinde ınfaıtta soqqylaryn jumsaǵan Alvaresti rasynda da teń tústi deý qısynsyzdaý kórinedi. Al ekinshi jekpe-jekte agressııa qosqany ras. Biraq, taǵy da basym tústi deı almaısyz.
Trılogııaǵa qatysty talaı boksshylardyń pikirin tyńdap júrmiz. Kópshiligi jas ári jyldam bolǵandyqtan Saýl Alvarestiń basym túsý múmkindigi mol degendi alǵa tartady. Ekinshi bir boksshylar soqqysy myǵym Golovkınniń jeńiske jetýi múmkin ekenin aıtady. Keıbir mamandar Golovkınniń aýtfaıter retinde judyryqtasqanyn jón kóredi. Iаǵnı, araqashyqtyqty saqtaı otyryp, qarsylasynyń degbirin qashyrǵanyn qalaıdy. Al, býkmekerlik keńseler Alvarestiń jeńisine senimdi...
Bizdińshe, úshinshi jekpe-jekte Golovkınge baryn salýǵa týra keledi. Birinshiden, qazaq oǵlany ózin ınfaıter retinde de, aýtfaıter retinde de kórsetýi tıis. Jaqyn qashyqtyqty joıqyn soqqylardy darytyp, alys qashyqtyqqa ótkeni lázim sekildi. Al sol qol únemi qımylda bolýy, ózi rıngti aınalyp júrip bokstasqany jón. Bizdińshe bolǵanda mundaı pikirdi biz emes, bylǵary qolǵap kıip júrgen boksshylar da aıtyp júr. Biraq, 40 jastaǵy boksshynyń oǵan tózimi jete me degendi tilge tıek etetinder az emes. Qarsylasty nokaýtqa túsirem deý - bos áýreshilik. Eki boksshyda 24 raýnd boldy. Bir-birin shyndap teńselte almady. Sondyqtan qorǵanysta saýatty bokstasqan jón. Golovkınniń bapkeri Djonatan Benks qandaı strategııa quryp shyǵatyny belgisiz. Bir anyǵy, Golovkın qajetsiz soqqylardy qabyldamaýy kerek.
Bul shaıqasqa qatysty boljam aıtý qıyn. Ekeýi bir-birine ábden laıyq qarsylas. Kimniń komandasynyń strategııasy myqty bolady, sol jeńedi. Al biz Golovkın jıyrma besinshi raýndtan bastap jekpe-jek tizginin qolǵa alǵanyn qalaımyz. Tóbelesti ysyryp qoıyp, Dmıtrıı Bıvol sekildi bokstassa deımiz... Qysqasy, Golovkınge jeńis aýadaı qajet. Jeńiske jetip jatsa, tórtinshi kezdesý ótýi de yqtımal.
