Bıyl Mahambet aýdanyndaǵy Jalǵansaı aýylynda 1 gektarǵa 17 myń túp qulpynaıdyń ıtalııalyq, kalıfornııalyq túrilerin egipti. Qulpynaıdyń bul suryptary ystyqqa da, sýyqqa da tózimdi eken. Ony tamshylatý ádisimen sýarady.
– Buryn jeke kásippen de, egin sharýashylyǵymen de aınalyspaǵan edim. Koronavırýs ınfeksııasy bastalǵanda, turǵyndar tarapynan qoıdyń quıryq maıyna, lımon men ımbırge, oǵan qosa qulpynaı men tańqýraı syndy jemis-jıdekten qaınatylǵan tosaptarǵa suranys arta tústi. Sol kezde Atyraýǵa Túrkııa men Qyrǵyzstannan bir qoraby 2 500 teńge turatyn qulpynaı ákelinetinin estidim. Bazardan satyp alǵan sol qulpynaıdyń dámi de, túri de kóńilimnen shyqqan joq. Sebebi birneshe kún kólikpen tasymaldanǵan jumsaq jemis ezilip qalǵan, – deıdi Nurjigit Raqymjanov. Osylaısha, eki jyl buryn qulpynaıdy ózi ósirýge bel býdy. Biraq aldymen onyń ósirý ádisin zerttedi. Nıderland men Italııanyń baǵbandarymen pikirlesip, tuqym erekshelikterin salystyrdy. Sóıtip, byltyr tájirıbe retinde úıiniń aýlasyna 2 myń túp qulpynaı egip kórdi.
– Qazir ıtalııalyq «Kleır» jáne kalıfornııalyq «Albıon» dep atalatyn qulpynaıdyń 17 myń túbin ósirip otyrmyn. Bul qulpynaılar ári iri, ári dámdi, bizdiń óńirdiń aýa raıyna tózimdiligimen erekshelenedi. «Kleır» jemisti kóktemde beredi. Al «Albıonnan» erte kóktemnen qarashaǵa deıin ónim alýǵa bolady. Qulpynaı ósirý úshin tuqymy men surpy sapaly bolýy kerek. Sýarý, tyńaıtqyshpen óńdeý, túrli aýrýlardan qorǵaý tehnologııasyn meńgerý qajet, – deıdi Nurjigit Raqymjanov.
Atyraý oblysy
