«Qyrkúıek aıynyń 8 kúninde oblys boıynsha 217 syrqat tirkeldi, al tamyz aıynyń alǵashqy 8 kúninde naýqastyń sany 582 bolǵan edi», deıdi oblystyq densaýlyq saqtaý basqarmasy medısınalyq kómekti uıymdastyrý bóliminiń basshysy Aıgúl Qulbaraqova. Bul, árıne, jedel ári saýatty qımyldap, syrqattardy sátti emdegen dárigerlerdiń de arqasy.
Jyl basynan beri óńirde 12 654 adam koronavırýs juqtyryp, esepke alynǵan eken. Al jalpy pandemııa bastalǵaly beri mundaı syrqattardyń sany 52 713-ke jetken. Búginde oblys boıynsha 269 ınfeksııalyq tósek daıyndalǵan bolsa, ol jerde qazir 23 naýqas em alýda. Naýqastardyń basym kópshiligi (19-y) vaksına almaǵan. Jansaqtaý bóliminde jatqan 2 naýqastyń ilespe aýrýlary asqynyp tur, olar da aldyn ala ekpe almaǵan bolyp shyqty.
Koronavırýstyń beti qaıtqandaı bolǵanymen, bosańsýǵa bolmaıdy. Qazir oblys aýmaǵynda jalpy sany 96 mobıldik brıgada kezekshilikte tur. Olardyń 32-si Oral qalasynda bolsa, aýdandarda 64 brıgada bar. Jyl basynan beri bul toptar 43 958 márte shaqyrtý alyp, jolǵa shyǵypty. Sonyń ishinde 18 889 adamnyń syrqaty koronavırýs bolyp shyqqan.
– Koronavırýsqa qarsy eń senimdi qorǵan vaksına ekeni ábden dáleldendi. Sondyqtan ekpe alýǵa asyǵyńyzdar, – dedi A.Qulbaraqova.
Búginde oblysta Comirnaty vaksınasy men qytaılyq Vero Cell vaksınasy bar. Al jaqyn kúnderi óńirge 3 myń doza QazVac, qarasha aıynda 4 680 doza Comirnaty vaksınasy jetkizilmek.
Sońǵy málimetke qaraǵanda, oblysta 288 345 adam koronavırýs ınfeksııasyna qarsy vaksınanyń I komponentin, 277 468 adam II komponentin tolyq alǵan.
Batys Qazaqstan oblysy
