IIM Ekstremızmge qarsy is-qımyl departamenti bastyǵynyń orynbasary, polısııa polkovnıgi Darhan Razýevtiń aıtýynsha, sońǵy ýaqytta Astana men Almaty qalalarynda, sondaı-aq elimizdiń keıbir óńirlerinde iri saýda-oıyn saýyq ortalyqtary, áýejaılar, mektepter, sot ǵımarattary belgisiz adamdar tarapynan anonımdi shabýylǵa ushyraǵan.
– Quqyq qorǵaý organdary kez kelgen nysandy mınalaý týraly aqparat kelip túsken kezde naqty qaýiptiń qaterin baǵalaı otyryp áreket etedi. Barlyq kelip túsken qaýip-qaterler boıynsha shuǵyl qyzmetter mindetti túrde oqıǵa ornyna barady, obektilerge egjeı-tegjeı tekserýler júrgizedi, jarylǵysh qurylǵylardy izdeıdi jáne onyń saldaryn boldyrmaý úshin kezek kúttirmeıtin sharalardy qabyldaıdy. Quqyq qorǵaý organdary qaýiptilik týyndaıtyn aımaqtan adamdardy evakýasııalaýǵa mindetti. Bul óz kezeginde adamdardyń josparlaryn buzady jáne ómirdiń úırenishti jaǵdaıyna kedergi keltiredi. Barlyq jaǵdaıda jarylǵysh zat qoıylǵany týraly aqparat rastalmaı jatady. Qylmyskerdiń qylmys jasaý sebebi ártúrli bolýy múmkin: kek alý, buzaqylyq, ózine nazar aýdartý. Oılanbaı jasaǵan áreketi úshin kámelet jasyna tolǵan adamǵa qylmystyq jaza qarastyrylǵanyn esten shyǵarmaǵan jón, – deıdi Darhan Razýev.
Árıne, erikkender kóp uzamaı qolǵa túsedi. Sebebi ishki ister organdarynyń ıeliginde sońǵy úlgidegi tehnıkalyq qondyrǵylar bar. «Telefon terrorızmi» faktilerine tosqaýyl qoıyldy desek te, sońǵy ýaqytta ınternet jelileriniń elektrondyq poshtalary arqyly jalǵan habarlamalar taratý jıilep ketken. Osyǵan baılanysty Ishki ister mınıstrligi múddeli memlekettik organdarmen birlese otyryp, arnaıy top qurǵan. Mamandar tobynyń qyzmeti sheteldik áriptestermen, sondaı-aq kompanııalarmen IR-mekenjaılardy, akkaýnttardy jáne elektrondyq mekenjaılarmen baılanysty basqa da derekterdi anyqtaý boıynsha ózara áreket etýge baǵyttalǵan.
Jalpy atalǵan qylmys boıynsha bıyl 8 aıda sotqa 14 qylmystyq is joldanyp, 13 adamǵa sot úkimi shyǵarylǵan. Olardyń jeteýi bas bostandyǵynan aıyrylyp, tórt adam bas bostandyǵyn shekteý jazasyna tartylǵan. Bir azamatqa qatysty májbúrli medısınalyq shara qabyldandy.
Elimizde atalǵan qylmysty jasaǵany úshin bes myń aılyq eseptik kórsetkish mólsherinde aıyppul (búginde 15,9 mln teńge) salý nemese túzetý jumysyna tartý, sondaı-aq bes jylǵa deıingi merzimde bas bostandyǵynan shekteý nemese aıyrý jazasyna tartý kózdelgenin atap ótken jón. Qylmystyq jaýapkershilik 14 jastan bastalady. Sottyń sheshimine sáıkes, osyndaı habarlamanyń saldarynan keltirilgen zalaldyń barlyq shyǵyny óteledi. Mundaı is-áreketti kámeletke tolmaǵandar jasaǵan jaǵdaıda shyǵyndardy óteý olardyń ata-analaryna nemese zańdy ókilderine júkteledi.
