22 jastaǵy J.Qulambaeva Italııadaǵy dodada latvııalyq Darıa Semenıstaıamen birge jup qurap, fınalda qytaılyq Djıng Lıý men bosnııalyq Anıta Vagnerdi tize búktirip, jarystyń bas júldesin oljalady. Bir saǵattan astam ýaqytqa jalǵasqan matchta qazaqstandyq-latvııalyq jup eki sette 6:2, 6:2 esebimen jeńiske jetti. Osylaısha, Jibek bıylǵy maýsymda ITF jarystaryndaǵy besinshi tıtýlyna qol jetkizdi. Ol sporttyq jolynda juptyq synda barlyǵy 19 ret úzdik shyqty. Oǵan qosa, eki márte jekeleı jarystyń chempıony atanǵan.
Sondaı-aq qazaqstandyq jasóspirim tennısshiler Ázerbaıjan astanasy – Bakýde ótken 14 jáne 16 jasqa deıingiler arasyndaǵy Tennis Europe dodasynda tabysty óner kórsetti. Atap aıtqanda, Team Kazakhstan akademııasynyń túlekteri Demıd Gorbachev pen Mansur Sháken juptyq synda qarsylas shaq keltirmedi. Olar fınalda ırandyq Kırash Hanıfı men túrkııalyq Barýk Sıvaslıden aılasyn asyrdy – 6:2, 6:2.
