«О́zge emes, ózim aıtam óz jaıymdy...»

El gazeti «Egemenniń» elde turatyn ardageri Dáýlet Seısenulynyń kezekti týyndysy osylaı dep atalady. Kitap atyna oraı avtor bul eńbeginde óziniń kóp jylǵy jýrnalıstik ómir jolymen birge, ulylar elindegi san qıly oqıǵalardy, beıbit kúnde qyryq jylǵa sozylǵan atom apatynyń tragedııalyq saldaryn, elimiz egemendikke qol jetkizgennen bergi jerdegi ondaǵy oń ózgerister men áli de oryn alyp kele jatqan olqylyqtardy baıyrǵy qalamger retinde shynaıylyqpen kórsetip, baıypty baılamyn ortaǵa salady. Sonymen birge, kitapta ár kezeńderde el basqarǵan jergilikti azamattar týraly sóz qozǵalyp, olardyń qoǵam damýyna qosqan úlesterin avtor ózindik oı-pikirimen tereńnen aqtarǵan. Dáýlet Seısenuly Elbasymyz «Otany­­myzdyń bas gazeti» dep óziniń baǵasyn ber­gen «Egemende» az-kemi joq shırek ǵasyr qyz­met etti. Sol sebepten de bolar, jańa týyndysynda sol jyl­dar týraly erekshe tebirenispen sóz qozǵap, basylymnyń ár kezeńdegi basshyla­ry, basqa da áriptesteri týraly júrekjardy sózderin aıtqan. Áriptesimizdiń kitabynda tilshilik jumystyń qyzyǵy men qıynshylyǵy da kóldeneń tartylady. Soǵan oraı ezý tarttyratyn sátti shtrıhtar da az emes. «Egemenniń» turaqty aksııasyna aınalǵan «Ulylyqqa taǵzym» jaıaý joryq ekspedısııasynyń turaq­ty múshesi retinde de avtordyń esteligi tar­tymdy. Sonyń bári qosyla kelgende, bul kitap bıylǵy jyldyń sońynda 95 jyldyǵy atap ótiletin baıyrǵy basylym men onyń qalyń oqyrmandaryna tamasha tartý dese de bolady. Kitaptyń tili jeńil, baıandalýy jatyq, bezendirilýi ásem. Áriptesimizge jańa týyndyńyz qutty bolsyn deımiz. Jaqsybaı SAMRAT,  «Egemen Qazaqstan».