«Jastar rýhy» jastar qanatynyń tóraǵasy Ákejan Keńesov konferensııa barysynda Amanat partııasy jastar qanatynyń kezekten tys VI sezinde jańa baǵdarlama qabyldanyp, ortalyq keńestiń quramy men Jas Otan ataýynyń ózgergeni týraly eske salyp ótti. «Rýh – halqymyz úshin qasıetti uǵym. Bul ataýdyń maǵynasy óte tereń, ár azamatqa úlken jaýapkershilik júkteıdi. Amanat partııasynyń jastar qanatynyń transformasııasy jaı ǵana ataýdy ózgertý emes. Jańǵyrý úderisindegi jastardyń erekshe rólin kórsetetin, qundylyqtar men ustanymdardy aıqyndaıtyn jańa Jastar baǵdarlamasynyń júzege asýymen tyǵyz baılanysty», dedi Ákejan Keńesov.
Ákejan Keńesovtiń aıtýynsha, megapolıs aýdandarynda jastar uıymdary belsendi jumys isteıdi, olar qaladaǵy 20 shaqty joǵary oqý orny men 30-ǵa jýyq orta jáne arnaıy bilim berý mekemesinde ornalasqan. Búginde «Jastar rýhynyń» quramynda 4 myńnan astam belsendi bar. «Jastar rýhynyń» belsendileri «Ardagerlerdi ardaqtaıyq» aksııasyn turaqty uıymdastyryp keledi. Bıyl alǵash ret Qaisar áskerı-patrıottyq jobasyn bastady. Onyń aıasynda eki júzden astam joǵary synyp oqýshysy dene shynyqtyrý daıyndyǵynan ótti. Al TazaLike jobasy sheńberinde 15 senbilik ótkizildi. Tarıhty, ádebıetti zertteýge baǵyttalǵan zııatkerlik oıyndar, balalar men jastar arasynda ınternetke táýeldilik pen qumar oıyndardyń aldyn alý – belsendi jastar tarapynan turaqty ótkizilip turatyn is-sharalar.
Qala jáne oblystardaǵy jas depýtattar korpýsymen birlesip birneshe kóshpeli otyrystar ótkizgen belsendiler stýdentter jataqhanalarynyń qurylys barysyn baqylaýǵa alǵan. Referendým kezinde de eriktiler tarapynan aqparattyq qoldaý kórsetildi.
Qamqor charity qoǵamdyq qorynyń tóraǵasy, Almaty qalasy ákimi janyndaǵy Jastar keńesiniń múshesi Baǵdat Anarbaeva: «Joldaýda jastar qoldaǵan kóptegen jaqsy tezıster jarııalandy. Áleýmettik salada jáne bilim berýde belgilengen ózgerister, jańa mektepter salynyp, medısınalyq mekemeler modernızasııalanatyndyǵy elimizdiń damýyna oń yqpalyn tıgizedi», dedi. Sondaı-aq ol Qamqor charity kompanııasynyń jumysyna toqtalyp, ata-ana qamqorlyǵynsyz qalǵan balalarmen jáne jalǵyzbasty zeınetkerlermen belsendi jumys júrgizilip jatqanyn atap ótti. Onyń aıtýynsha, «Áleýmettik sheberhana» jobasy aıasynda balalar úıinde mamandyqtar tegin oqytylady. Búginde 20 bala mobılıografııa, aspazdyq, SMM kýrstarynda bilim alýda. Sonymen qatar eriktiler qarttar turatyn áleýmettik úılerge, jalǵyzbasty zeınetkerlerge qamqorlyq jasaýdan jalyqpaıdy.
Almaty
