Jaqynda Baızaq aýdanynda Ázimbek Janqulıevtiń 60 jyldyǵyna oraı «О́nerdiń aqqan juldyzy» atty eske alý keshi uıymdastyryldy. Ál-Farabı atyndaǵy mádenıet úıinde ótken is-sharaǵa jergilikti halyq kóp jınaldy.
Aqynnyń aty ardaqtalǵan is-shara barysynda elimizdiń eńbek sińirgen ártisi Asqarbek Seıilhan, aıtysker aqyndar Erbol Qambatyrov pen Eset Dosaly aıtys aqynynyń kisilik kelbeti, azamattyq ustanymy týraly estelikterin ortaǵa saldy. Sondaı-aq olar Ázimbektiń úlken aıtystarda oraıyn taýyp aıtqan utymdy shýmaqtarynan úzindiler keltirdi. Oblystyq Aýǵan soǵysy ardagerleri uıymynyń tóraǵasy Kerim Izbasarov pen jergilikti aqyn Janatbek Turǵynbaıtegi jyly estelikterimen bólisti.
«Talantymen talaılardy tamsandyrǵan Ázimbektiń elimizdegi úlken aıtystarda jasyndaı jarqyraǵanyn barshamyz jaqsy bilemiz. Ádemi áýenimen, shyraıly shýmaqtarymen daralanǵan Ázimbek О́zbekstan, Túrkııa elderinde ótken jyr dodalarynda da júldeger atanǵan bolatyn», dedi jergilikti aqyn Qasqyrbaı Narbatyr zamandasy týraly syr shertip.
Bul kúni Ázimbektiń álemine úńilgender aqynnyń óleńderin oqydy, júrekke jyly tıgen ánder shyrqaldy. Is-shara sońynda Ázimbektiń aǵasy Altynbek Janqulıev eske alý keshin uıymdastyrǵan azamattarǵa rızashylyǵyn jetkizdi. Ázimbekti aıtys ónerine baýlyǵan Qasqyrbaı Narbatyrdyń ıyǵyna zerli shapan japty. О́z kezeginde Baızaq aýdany ákiminiń orynbasary Dáýir Dáýletov marqumnyń aǵasy Altynbek pen ápkesi Meıizkúlge qurmet kórsetti.
Jambyl oblysy,
Baızaq aýdany
