Ańyz oıynshylar kortpen qoshtasty

Serena Ýılıams 1981 jyldyń 26 qyr­kúıegine AQSh-tyń Mıchıgan shtatyndaǵy Sagıno qalasynda dúnıege keldi. Kópbalaly otbasynda týyp-ósken qyzdaryn ákesi balaýsa shaǵynan tennıske baýlydy. Solardyń arasynan sýyrylyp shyqqan Vınýs pen Serena ýaqyt oza álemniń eń myqty tennısshileriniń sanatyna erkin qosyldy. Ekeýi de kezinde dúnıe­júzilik reıtıngte uzaq ýaqyt boıy kósh bastady. Serena 1996 jyldy 216-orynmen qorytyndylasa, kelesi jyly WTA reıtın­ginde 22-orynǵa kóterildi. Sodan keıin-aq onyń órleý kezeńi bastaldy. Ol uzaq ýaqyt boıy álem­dik reıtıngte kósh bastady. Amerı­kalyq sport­shynyń qol jetkizgen tabystary tómendegideı:

- Olımpıada chempıony (2012)

- Juptyq saıysta Olımpıadanyń úsh dúrkin chempıony (2000, 2008, 2012)

- Jekeleı básekede «Úlken dýlyǵa» sana­tyndaǵy týrnırlerdiń 23 dúrkin jeńimpazy (2002-2017)

- Juptyq saıysta «Úlken dýlyǵa» sana­tyn­daǵy týrnırlerdiń 14 dúrkin jeńimpazy (1999-2016)

- Mıkste «Úlken dýlyǵa» sanatyndaǵy týr­nırlerdiń 2 dúrkin jeńimpazy (1998)

- WTA qorytyndy týrnıriniń bes dúrkin jeńimpazy (2001, 2009, 2012-2014)

- WTA týrnırleriniń jekeleı saıystarynda 72 ret top jardy

- 319 apta boıy álemniń birinshi raketkasy ataǵyn saqtap tur.

Qazaqstannyń burymdylarymen Serena Ýılıamstiń joly 15 márte qıysty. Sonyń 14-inde ol jeńis toıyn toılady. AQSh ten­nısshisi Iаroslava Shvedovany bes ret, Iýlııa Pýtınseva men Zarına Dıasty úsh ret, Galına Voskoboeva men Sesıl Karatanchevany bir ret utty. Eń sońǵy 15-kezdesýinde Ýılıams Elena Rybakınaǵa ese jiberdi. Bul 2021 jyly bol­ǵan edi. Parıjde uıymdastyrylǵan Rolan Garros týrnırinde jerlesimiz shaý tartyp qalǵan áıgili tennısshiden 6:3, 7:5 esebimen basym tústi.

Rodjer Federer 1981 jyldyń 8 tamyzynda Shveısarııanyń Bazel qalasynda dúnıege keldi. Onyń áke-sheshesi de kezinde áýesqoılar arasyndaǵy jarystarǵa qatysyp, júldeli oryndardy ıelengen. Sodan keıin uldarynyń myqty oıynshyǵa aınalýyna barynsha eńbek sińirdi. Rodjerdiń ózi bozbala shaǵynan Ger­manııanyń ataqty tennısshisi Borıs Bek­kerge eliktep ósti. Alǵash ret ol 2003 jyly «Úlken dýlyǵa» týrnırlerinde top jaryp, kópshilik nazaryn ózine aýdardy. 22 jasynda tolaǵaı tabysqa qol jetkizgen Federer odan keıingi 20 jyl ýaqyt aralyǵynda qandaı jarystarǵa qatyssa da, basty favrıtterdiń biri sanaldy. Shveısarııanyń maqtanyshynyń baǵyndyrǵan belesteri mynadaı:

- Juptyq saıysta Olımpıada chempıony (2008)

- Jekeleı básekede Olımpıada chempıony (2012)

- Jekeleı básekede «Úlken dýlyǵa» sana­tyn­daǵy týrnırlerdiń 20 dúrkin jeńimpazy (2002-2017)

- ATR álemdik týrynyń 6 dúrkin jeńimpazy (2003, 2004, 2006, 2007, 2010, 2011).

- Jekeleı básekede ATR týrnırleriniń 101 dúrkin jeńimpazy

- Juptyq saıysta ATR týrnırleriniń 8 dúrkin jeńimpazy

- 319 apta boıy álemniń birinshi raketkasy ataǵyn saqtap turdy

- Devıs kýbogynyń jeńimpazy (2014)

Rodjer Federerdiń áli de asa joǵary deńgeıde oınaýyna áleýeti jetetin edi. Olaı deýge negiz, onyń qaı jarysqa qatyssa da, jar­ty jolda súringen kezderi sırek. Biraq túrli jaraqattary jıi-jıi mazalaǵannan keıin Rodjer kortpen qoshtasýdy qup kór­di. Bul sportshymen Qazaqstannyń birneshe tennısshisi kezdesti. Biraq olardyń eshqaısysynyń dańqty oıynshyǵa álderi jetpedi.