Kollajdy jasaǵan Qonysbaı ShEJIMBAI, «EQ»
Oblys ákimi baspasóz qyzmetiniń habarlaýynsha, kezdesý barysynda kosmomonıtorıng salasyndaǵy yntymaqtastyq baılanystardy keńeıtý máselesi talqylandy. О́ńir basshysy Jetisýda aýyl sharýashylyǵyna erekshe den qoıylyp otyrǵanyn jetkizdi. Sondyqtan ǵaryshtan monıtorıng jasaý maqsatty paıdalanylmaı jatqan aýyl sharýashylyǵy jerlerin anyqtaýǵa septigin tıgizip, bul úderiske jańa qarqyn bermek.
A.Aıymbetov respýblıkalyq bıýdjettik baǵdarlamalar aıasynda kórsetiletin tegin qyzmetterge toqtalyp, jýyrda iske qosylǵan Kaznedra jáne JerInSpectr sıfrly jańa platformalary týraly aıtty.
Bıznesti damytý jáne halyqaralyq yntymaqtastyq departamenti Halyqaralyq yntymaqtastyq basqarmasynyń bastyǵy Rýstam Abdrahmanovtyń sózine súıensek, «Qazaqstan ǵarysh sapary» UK» AQ ǵarysh monıtorıngi salasynda 40-tan astam baǵytta jumys isteıdi, sonyń 8-i alqaptardy, ormandardy, sý nysandaryn, jaılaýlardy, jer paıdalanýdy, tótenshe jaǵdaılardy, qaldyqtar men jer qoınaýyn paıdalanýdy monıtorıngileý baǵyttarynda qyzmet kórsetedi. Máselen, ósimdikter kosmomonıtorıngi kún saıyn ósimdiktiń jaı-kúıin, lastanýy men shyǵymdylyǵyn baǵalaýǵa qatysty aqparat jınaýǵa múmkindik beredi, sondaı-aq ósimdiktiń túrin anyqtaýǵa kómektesedi. Al sýarmaly jerlerdiń monıtorıngi ósimdikterdiń sýarylý kólemin jáne sýdy tutynýyn qadaǵalaıdy. Bul – ǵarysh monıtorınginiń zor múmkindikteriniń shaǵyn bir bóligi ǵana.
«Ekologııalyq máseleler bizdi de alańdatady. О́ńirde qaraýsyz qalǵan qaldyq qoımalary az emes, qazir bizge ınvestorlar rekýltıvasııa jasaýǵa usynys bildirip jatyr. Bizdi qaldyq qoımalarynyń jaǵdaıy, jer qoınaýyndaǵy qor kólemi sııaqty kóptegen másele tolǵandyrady. Osy baǵytta da sizdermen birigip jumys istesek», dedi oblys ákimi B.Isabaev.
R.Abdrahmanovtyń aıtýynsha, arnaıy tapsyrys berilse, ǵarysh monıtorıngi quraldarynyń nátıjesinde mundaı baǵytta da tolyq aqparat jınaqtap berýge múmkindik bar.
B.Isabaev oblys ǵarysh monıtorıngimen aýyl sharýashylyǵy, stıhııalyq qoqys oryndaryn, zańsyz qurylystar men jer qoınaýyn paıdalanýdy anyqtaý boıynsha yntymaqtasa jumys isteýge ázir ekenin jetkizdi. Tótenshe jaǵdaı oryn alǵan jaǵdaıda orman jáne dala órtteriniń taralý baǵytyna boljam jasaý, sol sııaqty zańsyz aǵash kesý oqıǵalaryn anyqtaý máselesi de ózekti. Osyǵan baılanysty tıisti oblystyq basqarmalar men departamentterdiń basshylaryna tapsyrmalar berildi.
«Bul baǵdarlamany tolyq qoldaımyz. Ol, rasynda da, paıdaly, bizdi qyzyqtyratyn nysandardy anyqtaýǵa ketetin ýaqytty birneshe ese qysqartady. Ortaq máselelerdi birlesip talqylaǵanymyzǵa qýanyshtymyn. Endi ár baǵyt boıynsha tyǵyz baılanys ornatatyn bolamyz», dep sózin túıindedi oblys ákimi.
«Qazaqstan ǵarysh sapary» UK» AQ tóraǵasy Aıdyn Aıymbetov aqparattyń ashyqtyǵy men qoljetimdiligin qamtamasyz etý, sol sııaqty bıýrokratııa men jemqorlyq táýekelderin azaıtýǵa yqpal etý ǵarysh monıtorınginiń mańyzdy mindetteriniń biri ekenin atap ótti.
Jetisý oblysy
