Memleket basshysy Qasym-Jomart Toqaev Joldaýda elimizde elektr qýatymen qamtamasyz etetin jelilerdiń úshten ekisiniń, jylý kommýnıkasııasynyń 57 paıyzynyń jáne sý qubyry jelisiniń jartysyna jýyǵynyń tozyǵy jetkenin aıtyp, «Tarıfti ınvestısııaǵa aıyrbastaý» jańa tarıf saıasatyna kóshýdi qamtamasyz etýdi tapsyrdy.
Energetıka vıse-mınıstri Jandos Nurmaǵanbetovtiń aqparatyna sensek, óndirýshi qýattardyń tozýyn 15 paıyzǵa tómendetý úshin 2035 jylǵa qaraı jyl saıynǵy ınvestısııany úsh esege ulǵaıtý qajet.
«Qazirgi ýaqytta salaǵa salynǵan ınvestısııalardy qaıtarýǵa jumsalatyn qarajat kólemine lımıt 32 mlrd teńge deńgeıinde belgilengen, ony 100 mlrd teńgege deıin ulǵaıtý qajet. Sondaı-aq ınvestısııalar aǵynyn qamtamasyz etý úshin elektr qýaty naryǵyndaǵy qoldanystaǵy tarıfti aıyna 1 MVt úshin aǵymdaǵy 590 myń teńgeden 1,2 mln teńgege deıin arttyrý qajet. Bul jylyna qosymsha 60 mlrd teńge tartýǵa múmkindik beredi. Onyń ústine elektr energııasyna tarıfti kúshpen ustap turýǵa baǵyttalǵan qazirgi saıasat ınflıasııanyń ósýin tolyq shamada eskermedi, bul salanyń ınvestısııalyq tartymdylyǵyna da áser etti», dedi ol.
Alaıda komıtet tóraǵasy, Májilis depýtaty Dúısenbaı Turǵanovtyń aıtýynsha, bul jerde másele tek jaryq, jylý jáne sý jetkizýshilerge ǵana emes, eń aldymen qatardaǵy tutynýshylardyń múddeleri týraly bolyp otyr. «Kommýnaldyq qyzmettegilerge qysym jasaýǵa jol bermeý kerek. Tarıfterdi bekitý kezinde ınflıasııamen qatar energetıkterge tólenetin jalaqynyń da birdeı ósýin qamtamasyz etken jón. Sebebi sala bilikti mamandarynan aıyrylyp qalýy múmkin. Kross-sýbsıdııalaýdan bas tartýǵa keletin bolsaq, qazir tarıfterdiń ósetini anyq, tek ol adamdardyń qaltasyna kóp salmaq salmaıtyndaı bolýy qajet», dedi depýtat.
О́z kezeginde UEM Tabıǵı monopolııalardy retteý komıteti tóraǵasynyń orynbasary Tımýr Qosymbaev kommýnaldyq qyzmetterge tarıfterdi qaıta qaraý boıynsha sheshim ár óńirge qatysty jeke qabyldanatynyn aıtty.
«Biz tutynýshylar men monopolıster arasyndaǵy teńgerimge qol jetkizý saıasatyn júrgizip jatyrmyz. Ekonomıkalyq jáne áleýmettik jaǵdaıdyń arasynda tepe-teńdik bolýy shart. Monopolıster óz tabysyn amortızasııa retinde paıdalanyp, onyń basym bóligin jelilerdi jóndeýge jáne jańartýǵa baǵyttaýy kerek. Jalpy, reforma boıynsha turǵyndar tóleıtin tarıfterdiń ósýi boljanyp otyr. Bul rette ýákiletti organ olardyń kúrt nemese negizsiz ósýine jol bermeıdi», dep sendirdi ol.
Sonymen qatar jıynda partııalyqtar elimizdiń jylý berý maýsymyna daıyndyǵyn talqylady. Energetıka mınıstrliginiń deregi boıynsha elektr stansalarynda 4 energoblokta (44%), 32 qazandyqta (53%), 26 týrbınada (62%) jóndeý aıaqtaldy. Al 5 energoblokta, 20 qazandyq pen 13 týrbınada jóndeý jumystary júrgizilýde. Qoımalardaǵy kómir qory 4,1 mln tonnany jáne 82 myń tonna mazýtty quraıdy, bul jalpy bekitilgen normaǵa sáıkes keledi.
Jıyn qorytyndysy boıynsha komıtet elektr stansııalary men qazandyqtarǵa jáne turǵyndardyń qajettilikteri úshin de kómir men mazýt jetkizýdi turaqty qamtamasyz etý, sondaı-aq bilim berý, densaýlyq saqtaý nysandaryn jylýmen jabdyqtaý júıesine ýaqtyly qosý máselesin erekshe baqylaýǵa alýǵa qaýly etti.
«Komıtet kommýnaldyq ınfraqurylymdy jańǵyrtý, tarıftik saıasatty reformalaý máselelerin sheshýdi turaqty baqylaýda ustap qana qoımaı, óz quzyreti sheńberinde osy úshin qajetti tetikterdi, onyń ishinde zańnamalyq deńgeıde ázirlep, usynady. Sonymen qatar tutynýshylar qarajatynyń maqsatty paıdalanylýyn qatań baqylaý, monopolısterdiń jaýapkershiligin arttyrýdy, tabıǵı monopolııa salasyndaǵy qyzmetti memlekettik retteý rásimderiniń ashyqtyǵyn qamtamasyz etý qajet», dep túıindedi D.Turǵanov.
