Qoja Ahmet Iаsaýı atyndaǵy Halyqaralyq qazaq-túrik ýnıversıtetine qarasty Almaty qalasynda ornalasqan Eýrazııa ǵylymı-zertteý ınstıtýtynyń ǵylymı qyzmetkerleri tarapynan daıyndalǵan The Wisdom of the Great Steppe – Abai Kunanbaiuly jáne «Abaı Qunanbaıuly: sıpattamaly bıblıografııalyq kórsetkish» atty ǵylymı eńbekterdiń tusaýkeseri bolyp ótti.
Ankarada basylyp shyqqan aǵylshyn tilindegi The Wisdom of the Great Steppe – Abai Kunanbaiuly ujymdyq monografııasy Abaı Qunanbaıulyn sheteldik qaýymǵa onyń murasyn jan-jaqty tanytýǵa mol múmkindik beretini sózsiz. Qazaqstan jáne shetel abaıtanýshylarynyń Abaıdyń ómiri, áleýmettik ortasy, ádebı aınalasy, ult zııalylaryna yqpaly, shyǵarmashylyq murasy, ádebı mektebi, shyǵarmalarynyń qoljazbasy, tildik ereksheligi, dinı kózqarasy, tarıhı dúnıetanymy boıynsha keń maǵlumat berilgen.
Tusaýkeserge arqaý bolǵan kelesi eńbek «Abaı Qunanbaıuly: sıpattamaly bıblıografııalyq kórsetkish» dep atalady. Onda 1889 jyly baspasózde Abaı týraly shyqqan alǵashqy maqaladan bastap, 175 jyldyq mereıtoıy atalyp ótken 2020 jylǵa deıingi barlyq jarııalanym qamtylǵan. Atalǵan bıblıografııalyq kórsetkishke Abaı shyǵarmalary men abaıtaný salasyndaǵy kitaptar, monografııalar, oqýlyqtar, oqý-ádistemelik quraldar, bıblıografııalyq materıaldar, dıssertasııalar (kandıdattyq, doktorlyq jáne PhD), gazet-jýrnal maqalalary men taǵy basqa da jarııalanymdardy qamtyǵan jalpy sany 12 myńnan asa derek engizildi.
Q.A.Iаsaýı atyndaǵy Halyqaralyq qazaq-túrik ýnıversıteti Eýrazııa ǵylymı-zertteý ınstıtýtynyń osynaý eńbegi abaıtaný salasyna qosqan súbeli úles dep bilemiz. Atalǵan is-sharaǵa qatysqan baıandamashylar men qonaqtar Eýrazııa ǵylymı-zertteý ınstıtýtynyń basshysy Sýat Beılurǵa jáne osy oqý ornynyń ǵylymı qyzmetkerlerine zor qajyr-qaıraty men tarıhı eńbekteri úshin alǵys bildirdi.
Aıjan AMANQOSOVA
TÚRKISTAN
