Prezıdent Qasym-Jomart Toqaevtyń «Ádiletti memleket. Birtutas Ult. Berekeli qoǵam» atty Joldaýynda aıtylǵan jastarǵa jaǵdaı jasaý, olardyń sapaly bilim alyp, turaqty jumyspen qamtylýy, tómen paıyzben nesıe alýy sııaqty mindet-usynystar aldaǵy ýaqytta júzege asatyn bolsa, qoǵamnyń jastar bóligi birqatar jeńildikke ıe bolar edi. Máselege osy turǵydan keletin bolsaq, elimizde endi jolǵa qoıylyp kele jatqan memleket pen kásipkerlik seriktestigin ári qaraı jalǵastyryp, qurylys kompanııalary úshin tıimdi usynystardy, salyqtyq jeńildikterdi qarastyrý múmkindikterin kóbeıtken abzal.
Memleket basshysy Joldaýda jataqhana máselesi memleket moınyndaǵy jaýapkershilik retinde qala beretinin aıtty. Osy oraıda jekemenshik joǵary oqý oryndaryndaǵy jataqhana máselesine memleket tarapynan qoldaý jasalatyny da oryndy. Búginde el jastarynyń aldynda úlken mindetter tur. Olar óz bilimin ári qaraı el kelesheginiń damýyna arnap, ekonomıkanyń qaı salasynda bolsyn eńbek etýdi qalaıdy. Prezıdenttiń balalarǵa 18 jasqa tolǵanǵa deıin arnaıy shot ashyp, onyń aldaǵy ýaqytta sapaly bilim alýyna múmkindik jasaý týraly usynysy – bolashaqqa jasalǵan kapıtal, kóptegen qoldaýǵa muqtaj otbasylar úshin úlken jeńildik.
Prezıdent Joldaýynda bes baǵyt boıynsha kótergen máseleniń barlyǵy da jurtshylyqtyń kókeıinde sheshimin tappaı júrgen kóptegen túıtkildi jaıtty iske asyrýǵa múmkindik beredi.
Rýslan AHMAǴANBETOV,
saıasattanýshy, PhD
ALMATY
