«Sýdıalardyń derbestigin arttyrý úshin Joǵarǵy sot keńesiniń mártebesin nyǵaıtqan durys», dedi Prezıdent. Al sýdıa bolýǵa úmitkerlerdi daıarlaý, biliktiligin kóterý jumysy Keńestiń quzyretine beriledi. «Sondaı-aq olardyń shekti jasyn uzartý, ókilettigin toqtatý máselesimen de osy mekeme aınalysady. Bul memlekettik organ naqty kadrlyq fýnksııasy bar, tolyqqandy ınstıtýtqa aınalýy kerek. Kadrlardy irikteýden bastap, barlyq deńgeıdegi sottardy taǵaıyndaýǵa usynym berýge deıingi búkil mindet solarǵa júkteledi», dep atap kórsetti Q.Toqaev Joldaýda.
Birinshiden, bul Memleket basshysynyń jaqyn arada sýdıalar korpýsyn qaıta irikteý jáne jańartý qajettigi týraly usynysyna toqtalsaq. Búgingi tańda Qazaqstanǵa jańa kadrlar men jańa tulǵalar qajet.
Sondaı-aq Prezıdenttiń elimizdegi barlyq sýdıanyń mártebesin teńestirý týraly aıtqany da der kezinde jasalǵan qajetti usynys dep sanaımyn. Bul sot tóreliginiń shynaıy táýelsizdigine qol jetkizýdi qamtamasyz etetin batyl qadam deýge bolady.
Qoldanystaǵy zańnama boıynsha barlyq sýdıa mantııa ıeleri sanalady jáne Qazaqstan Respýblıkasynyń atynan sot tóreligin júzege asyrady. Sondyqtan Qazaqstannyń barlyq sýdıasynyń mártebesin zańnamalyq turǵydan teńestirý qajet. Oǵan álemniń ozyq elderiniń sot tóreligi sapasynyń oń tájirıbesi jarqyn dálel deýge bolady.
Osy baǵyttyń zańdy jalǵasy retinde sot tóraǵalary laýazymdarynyń kóbin sýdıa laýazymyna aýystyrý týraly qısyndy qaǵıda týyndaıdy. Sot tóraǵalary da basqa sýdıalar sııaqty sot tóreligin júzege asyrady jáne sot isterin qaraıdy.
Dál qazirgi ýaqytta Prezıdenttiń tek sýdıalardyń ózderi demokratııalyq jolmen, konkýrstyq negizde sot tóraǵalaryn jáne ártúrli deńgeıdegi sot alqasynyń tóraǵasyn saılaýǵa quqyǵy bar úrdisti engizý týraly usynysyn júzege asyrý shynaıy qajettilikten týyndap otyr. Bul, eń aldymen, sýdıalardyń ózderi úshin yńǵaıly ekeni sózsiz.
Bizdiń zań salasynyń tarıhynda alǵash ret joǵary satydaǵy sýdıalardy – Joǵarǵy sotty saılaý usynylyp otyr. Bul qazirgideı Senattyń bekitýi emes, naqtylap aıtqanda, Prezıdent usynǵan kandıdattardan balama negizde saılaý bolyp sanalady.
Budan bıliktiń «Kúshti Prezıdent – yqpaldy Parlament – esep beretin Úkimet» tepe-teńdik áreketin kórýge bolady. Árıne, sýdıalar korpýsy jańartýdy, sonyń ishinde ıýrısprýdensııanyń basqa salasynan joǵary bilikti mamandardy tartýdy qajet etedi.
Sondyqtan Memleket basshysynyń bul salaǵa myqty zańgerlerdi tartý úshin materıaldyq jaǵdaı jasaý qajettigi týraly usynysyn ýaqyt talaby dep sanaımyn. О́zderińiz biletindeı, endi Prezıdenttiń bul usynystaryn jan-jaqty meńgerip, sapaly zań deńgeıinde júzege asyrý qajet.
Názılá RAZZAQ,
Májilis depýtaty
