Sýretti túsirgen Erlan OMAR, «EQ»
Jastarǵa jan-jaqty qoldaý kórsetý memleketimizdiń basty mindetiniń biri ekenin atap kórsetken Prezıdent Joldaýynda eńbekpen qamtıtyn túrli is-sharalar arqyly kelesi jyly 100 myń jasqa jumys berý qajettigin naqtylady. «Jastardyń kásipkerlik bastamalaryna qoldaý kórsetile bermek. Olarǵa jeńildetilgen tártippen jyldyq ósimi 2,5 paıyz bolatyn shaǵyn nesıe beriledi. Bul sharalar qoǵamnyń barynsha úılesimdi ári ádiletti bolýyna yqpal etedi», dedi Prezıdent. Osy oraıda aıta ketelik, bıyl Túrkistan oblysynda jastardy jumyspen qamtý josparyna sáıkes 29 307 jasty jumyspen qamtý kózdelýde. Olardyń basym kópshiligi «Jastar praktıkasy» jáne «Qoǵamdyq jumys» jobalarynyń aıasynda júzege aspaq. Al jyl basynan beri óńirdegi 6 myńnan asa jas turaqty jumysqa ornalastyrylǵan.
Memleket basshysy Qasym-Jomart Toqaev Joldaýynda «Jastarǵa jan-jaqty qoldaý kórsetý – memleketimizdiń basty mindetiniń biri» deı otyryp, birqatar mańyzdy máseleni sheshý joldaryn usyndy. Atap aıtqanda, «Jaıly mektep» ulttyq jobasy aıasynda 2025 jylǵa deıin 800 myń balany zamanaýı mekteptermen qamtamasyz etý kózdelýde. Bul óz kezeginde aýyl men qala mektepteriniń aıyrmashylyǵyn azaıtady. Tıisinshe bilim sapasy barlyq deńgeıde teńestiriledi. Sonymen qatar Memleket basshysy joǵary bilim berý júıesi boıynsha JOO oryndaryna oqýǵa túsýge UBT-da jınaǵan balyna jáne basqa da kórsetkishter boıynsha 30-100 paıyz mólsherinde granttardy bólý qarastyrylatynyn aıtyp ótti. Oǵan qosa stýdentterge oqý aqysyn tóleý úshin jyldyq 2-3 paıyzdyq jeńildetilgen nesıeler beriledi. Stýdentterdi jataqhanamen qamtamasyz etý boıynsha jańa jataqhanalardy memleket-jekemenshik seriktestigi arqyly júzege asyrýdy usyndy. Joldaýda aıtylǵan agroónerkásip salasyn sýbsıdııalaýdyń uzaq merzimge arnalǵan jańa tásilin ázirleý – oblystaǵy aýyl jastaryna jaǵymdy jańalyq. О́z kezeginde aýyl sharýashylyǵy salasynda kásipkerlikpen aınalysatyn jastarǵa jańa múmkindik beredi. Sondaı-aq jastardyń memlekettik jáne jergilikti basqarý oryndarynda, Parlamentte nemese máslıhattarda óz qarym-qabiletin kórsetýge, tyń bastamalary men ıdeıalaryn júzege asyrýyna múmkindigi mol. Mysaly, kúni keshe Memleket basshysy Qazaqstan halqyna úndeýinde saılaý aldyndaǵy partııalyq tizimdi jasaqtaý jáne depýtat mandattaryn bólý kezinde áıelder men jastar úshin 30 paıyzdyq kvota engizilgenin eske saldy. Saıası partııalardy tirkeý rásimi jeńildetilip, tirkeýdiń qajetti shegi tómendetilgeni aıtyldy. Májilis pen máslıhattar jańa aralas júıe boıynsha jasaqtalady.
Prezıdenttiń jastarǵa jasaıtyn qoldaýy nátıjesinde joǵary bilimge qol jetkizý, kásibı maman retinde qalyptasý – memleket irgetasyn qalaıtyn jastarǵa berilgen úlken múmkindik. Joldaýda áleýmettik jáne ekonomıkalyq saıasattyń arasyndaǵy tepe-teńdik saqtalǵan. Mysaly, «balyq berme, qarmaq ber» prınsıpi eskerile otyryp, el bolashaǵyna arnalǵan strategııalyq damýdyń naqty baǵyttary kórsetilgen. Qarashada eldiń búkil saıası júıesin túbegeıli ózgertetin saılaý kezeńi bastalady. Bul oraıda jastar elimizdi damytý jolyndaǵy óz jaýapkershilikterin sezinip, uzaq merzimdi mindetterdi júzege asyrýǵa múmkindik týdyratyn naýqanda belsendilik tanytatynyna senim mol.
Nurken ARALBEKOV,
Túrkistan oblysy qoǵamdyq damý basqarmasy otbasy jáne jastar máseleleri jónindegi bólim basshysy
