Dr.Web kompanııasynyń Ortalyq Azııadaǵy bas dırektory Ilıa Dybovtyń aıtýynsha, qazir álemdegi veb-qaýipterdiń kólemi qarqyndy túrde ósip keledi. Sol sebepti qaýipsizdik júıesine jiti kóńil bólgen durys deıdi ol.
«Qazir IT-diń enbegen salasy qalmady. Sáıkesinshe, álemde buǵan baılanysty qaýiptiń túri de kóbeıip jatyr. Bul ártúrli sıpattaǵy «troıandyq» vırýstardan bastap alaıaqtardyń áreketterine deıin qamtıdy. Ásirese jeke derekterge qatysty qaýip-qater azaımaı tur. Bul problemamen korporatıvtik jáne jeke jelilerdiń paıdalanýshylary betpe-bet kelýde. Biz osy baǵyttaǵy tájirıbemen Abaı oblysynyń turǵyndarymen bóliskimiz keledi», dedi I.Dybov.
Antıvırýstyq zerthananyń ókilderi aqparattyq qaýipsizdik máselesiniń ózektiligi ýaqyt ótken saıyn artyp bara jatqanyn aıtady.
«Antıvırýstyq júıeler – osy baǵytta kórsetiletin qyzmettiń bir tarmaǵy ǵana. Aqparattyq qaýipsizdik múldem basqa sala. Sondyqtan paıdalanýshylardyń bul jóninde tolyqqandy bilimmen qamtylýy óte mańyzdy dep sanaımyz. Tek adamdardyń bilimi men habardarlyǵy jeke derekterdiń 100% qorǵalýyna múmkindik beredi», dedi Dr. Web kompanııasynyń basshysy.
Jańadan ashylǵan zerthanada vırýsqa qarsy baǵdarlamalyq jasaqtamany ázirleýden bólek, barlyq derbes kompıýter paıdalanýshylaryna aqparattyq qaýipsizdikke arnalǵan kýrstar ótkiziledi dep josparlanǵan.
