Sherhan Murtazauly Murtaza Jambyl oblysy, Jýaly aýdany, Talapty aýylynda dúnıege kelgen. Qazaqstannyń halyq jazýshysy, qoǵam qaıratkeri, Qazaqstan Respýblıkasynyń eńbek sińirgen mádenıet qyzmetkeri. Búgin halyq jazýshysyna 90 jyl toldy.
Osy jyldyń sáýir aıynda Taraz qalasyndaǵy Sherhan Murtaza atyndaǵy «Rýhanııat jáne tarıhtaný» ortalyǵynda ótken jıynda jambyldyq aqsaqaldar qalamgerge eskertkish ornatý týraly qala turǵyndarynyń oıyn aıtqan bolatyn. Bul bastamaǵa «Kóne Taraz» qoǵamdyq qory qarjylaı qoldaý kórsetti. Mamyr aıynda Jambyl oblysynyń ákimi Nurjan Nurjigitovtyń tapsyrmasymen jazýshynyń eń úzdik músindik beınesine baıqaý jarııalanǵan bolatyn.
«Kóne Taraz» qorynyń tóraǵasy Muratbek Ázimovtiń aıtýynsha, eskertkish jobasyn irikteý jáne bekitý jónindegi komıssııanyń quramyna bir kezderi Sheraǵamen jeke tanys bolǵan qazaqstandyq mádenıet qaıratkerleri, ardagerler, shyǵarmashylyq zııaly qaýym ókilderinen turatyn 20 adam kirgen.
«Baıqaýǵa 17 úmitkerdiń jobasy usynyldy, keıbir músinshiler eskertkishtiń birneshe nusqasyn usyndy. Komıssııa músheleri 34 jastaǵy almatylyq músinshi Aıdos Búrkitbaevtyń, ál-Farabı, Shámshi Qaldaıaqov, Dına Nurpeıisova eskertkishteriniń avtory jumysyna biraýyzdan derlik daýys berdi. Úzdik dep tanylǵan joba Qazaqstan Respýblıkasynda salynyp jatqan eskertkishter jónindegi memlekettik komıssııanyń qaraýyna jiberildi», dedi «Kóne Taraz» qoǵamdyq qorynyń basshysy.
Sh.Murtazanyń músindik beınesin jasaý úshin A.Búrkitbaev onyń shyǵarmalaryn, ómirbaıanyn, ol týraly estelikterin qaıta oqyp shyqty, onyń portrettik beıneleri men ózi beınelengen fotosýretterin zerttedi.
Eskertkish ornatý úshin oryndy tańdaý qıyn boldy. Qala turǵyndarynyń áleýmettik jelide aıtqan qoǵamdyq pikiri de, mamandardyń pikiri de nazarǵa alyndy. Ol úshin arnaıy komıssııa qurylyp, Sherhan Murtaza eskertkishi ornatylatyn jer tańdaldy.
Saýalnama barysynda tarazdyqtar jazýshynyń eskertkishin ornatýdyń 14 nusqasyn atady. Maýsym aıynda arnaıy komıssııa men sáýletshilerdiń birlesken otyrysynda bul usynystar qaraldy.
«Talqylaý qorytyndysy boıynsha úsh oryn belgilend. Bul jer «Kóne Taraz» tarıhı-mádenı kesheniniń aýmaǵynda, Sherhan Murtaza atyndaǵy «Rýhanııat» ortalyǵy ǵımaratynyń dál aldyndaǵy jer. Ekinshi nusqa – Jastar alleıasynda jáne úshinshi nusqa – Jambyl dańǵyly boıyndaǵy Halyqaralyq Taraz ınnovasııalyq ınstıtýty ǵımaratynyń aldynda. Qorytyndy sheshim boıynsha, eskertkish Halyqaralyq Taraz ınnovasııalyq ınstıtýtynyń aldyna ornatý tańdaldy», dedi spıker.
