Memleket basshysy Qasym-Jomart Toqaev halyqqa Joldaýynda aýyldaǵy densaýlyq saqtaý máselelerine erekshe nazar aýdarǵany málim. Prezıdent kelesi jyldan bastap aýyl turǵyndarynyń qajettilikterine baǵyttalǵan ulttyq jobany iske asyrýdy bastaý týraly sheshim qabyldanǵanyn atap ótti. Bul baǵytta «Aýyldyq densaýlyq saqtaýdy jańǵyrtý» jobasy júzege aspaq.
О́ńirlik densaýlyq saqtaý basqarmasynyń basshysy Aıdar Seıitqazınovtyń aıtýyna qaraǵanda, aýyldyq eldi mekenderge 30 medısınalyq nysan qajet. Olardyń ekeýi – aýyldyq ambýlatorııa, beseýi – feldsherlik-akýsherlik pýnkt jáne qalǵany – medpýnktter.
– Jańa nysandardyń salynýymen óńirde jalpy sany 15 myńnan astam turǵyn sapaly medısınalyq qyzmetpen qamtylady dep kútilýde. Bul jobalardyń jalpy quny shamamen – 3,9 mlrd teńge. Buǵan deıin densaýlyq saqtaý uıymdary múlde bolmaǵan 3 aýylda jańadan medpýnkt turǵyzylmaq. Taǵy 9 nysan tozyp turǵan ǵımarattardy jańartýǵa jáne 18 qurylys jalǵa alynyp kelgen nysandardyń ornyna salynbaq. Jobalyq-smetalyq qujattamalardy Densaýlyq saqtaý mınıstrligi ázirleýde, respýblıkalyq transfertter bólinedi dep boljanýda. Al Pavlodar oblysyn damytý baǵdarlamasy aıasynda josparlanǵan 15 nysannyń bireýi – Aqsýdyń Qyzyljar aýylynda 100 orynǵa laıyqtalǵan aýyldyq ambýlatorııa salyndy. Qurylys basqarmasy taǵy úsh jobaǵa qujat ázirlep otyr. Kelesi jyly Ekibastuzdyń aýyldyq aımaǵyndaǵy Álkeı Marǵulan aýylynda jáne Aqsýdyń Pogranıchnık aýyly men Pavlodar aýdanynyń Naberejnoe eldi mekeninde medısınalyq mekemeler salynady, – dedi basqarma jetekshisi.
Alys aýyldarda turatyn halyqqa jyljymaly medısınalyq keshender qyzmet kórsetedi. Igiliktiń bul túrimen 29 myńǵa jýyq adam qamtylyp otyr. Keshenderdegi dárigerler qazirdiń ózinde 2 myńnan astam emdelýshiden túrli aýrýdy anyqtap, olardy dıspanserlik esepke qoıǵan. Buǵan qosa aýdandyq aýrýhanalar men perzenthanalarǵa jáne jan saqtaý bólimshelerine zamanǵa saı medısınalyq qural-jabdyqtar satyp alýǵa respýblıkalyq qazynadan 1,5 mlrd teńge bólinbek. Taǵy 1,2 mlrd teńge densaýlyq saqtaý mekemelerin kúrdeli jóndeýge baǵyttalady. Oblystyq densaýlyq saqtaý basqarmasy qajetti jabdyqtardy satyp alýdyń josparyn jasap, medısınalyq nysandardy jóndeýmen aınalysatyn merdigerlerdi anyqtady. Jańa quraldar alynsa, óńirlerdegi emdeý uıymdarynyń zamanǵa saı jaraqtalýy 85-ten 90 paıyzǵa deıin artady.
Buǵan qosa demeýshiler esebinen aldaǵy qazan aıynda 60 akýsher-gınekolog pen neonatologti oqytý josparlanyp otyr. Bul úshin Reseıden mamandar kelip, júkti analardyń jaǵdaıyna shuǵyl túrde baǵa berý boıynsha semınarlar ótkizbek. Al 18 medısına qyzmetkeri Tatarstannyń Qazan qalasyna jiberilip, onda ýltradybystyq zertteý boıynsha oqýdan ótpek. О́ńirdegi aq jeleńdilerge qursaqta jatqan balanyń alǵashqy damý kezeńinde densaýlyǵyndaǵy aqaýlardy anyqtaý mindeti qoıylyp otyr.
Atap óterligi, bıyl ekstrakorporaldy uryqtandyrý boıynsha óńirge 281 kvota bólingen. Qazir 82 jup sábı súıý baqytyn asyǵa kútýde. Taǵy 80 erli-zaıyptydan oń nátıje shyǵady dep boljanyp otyr. Byltyr bala kótere almaý máselesi boıynsha Pavlodardaǵy reprodýktıvti ortalyqta 1,5 myń erli-zaıypty tirkelgen edi. «Ańsaǵan sábı» baǵdarlamasy arqyly júzden astam otbasy náresteli boldy. Olardyń arasynda egiz balaly bolǵandar da bar.
Pavlodar oblysy
