Osyǵan oraı Memleket basshysy: «Elimizdiń aýyl sharýashylyǵy ónimderiniń kólemin jáne onyń qosymsha qunyn arttyrý qajet. Bul – strategııalyq mindet. Qazir tek bıdaı men mal satyp otyratyn zaman emes», deı kele, Úkimetke agroónerkásip salasyn sýbsıdııalaýdyń uzaq merzimge arnalǵan jańa tásilderin ázirleýge tapsyrma bergen edi.
Joldaýda Prezıdent tapsyrǵan agrarlyq sektordy sýbsıdııalaý, aýyl turǵyndarynyń tabysyn arttyrý jáne ınvestısııalyq jobalardy iske asyrý mindetteri qalaı júzege asyrylyp jatyr? Májilis depýtaty Qaınar Abasovtyń tóraǵalyǵymen ótken Amanat partııasy janyndaǵy Agroónerkásiptik komıtettiń otyrysynda osy jáne ózge de máseleler talqylandy.
Aýyl sharýashylyǵy mınıstri Erbol Qarashókeevtiń aıtýynsha, osy saladaǵy sýbsıdııalardyń tıimdiligi men nátıjeliligin arttyrý úshin ony alýshylarǵa birqatar mindetteme engizý josparlanyp otyr.
«Bul óz óndirisiniń ónimin jyl saıyn keminde 3 paıyzǵa ulǵaıtýdy qamtamasyz etý (fors-major jaǵdaılardy qospaǵanda), eńbek ónimdiligin jyl saıyn arttyrý jáne negizgi kapıtalǵa ınvestısııa quıýdy qamtamasyz etý», dedi mınıstr.
Komıtet otyrysynda baıandama jasaǵan E.Qarashókeev aýyl turǵyndarynyń tabysyn arttyrý baǵytynda atqarylyp jatqan jumysqa da nazar aýdardy. Agroónerkásiptik keshendi 2025 jylǵa deıin damytý jónindegi Ulttyq joba sheńberinde aýyl turǵyndaryn nesıelendirý jumysy kózdelip otyr. Osy maqsatta 2023 jyldan bastap jyl saıyn 7500 shaǵyn nesıe berý josparymen 30 mlrd teńge somasynda qarjylandyrý kólemi qarastyryldy. Sondaı-aq mınıstr ınvestısııalyq jobalardy iske asyrý máselesine de jeke toqtaldy.
«Memleket basshysy Qasym-Jomart Toqaev «Ádiletti memleket. Birtutas ult. Berekeli qoǵam» atty Qazaqstan halqyna Joldaýynda agroónerkásiptik keshendi damytý máselesine qatysty birqatar mindet qoıǵan bolatyn. Bıyl Agroónerkásiptik keshende 81,1 mlrd teńge somasyna 110 ınvestısııalyq joba paıdalanýǵa berildi. Nátıjesinde, 2022 jyldyń 8 aıynda AО́K-tiń negizgi kapıtalyna quıylǵan ınvestısııa kólemi 524,8 mlrd teńgeni qurady. Bul 2019 jyldyń uqsas kezeńimen salystyrǵanda 1,7 ese kóp (306,3 mlrd teńge). Jyl sońyna deıin 127 ınvestısııalyq jobany iske qosý josparlanyp otyr», dep atap ótti ol.
Otyrys qorytyndysy boıynsha komıtet beıindi memlekettik organdarǵa arnalǵan birqatar naqty usynymdar qabyldady. Aýyl sharýashylyǵy salasyna mıllıardtaǵan qarjy bólinip otyr. Al qaıtarymy qalaı bolmaq?
