Al ómirge egiz, ne úshem kelse she? Ata-ana qýanyshy odan saıyn eselene túsedi. Qurmanǵazy aýdanynda S.Kóshekbaev atyndaǵy mádenıet úıinde ádettegiden ózgeshe is-shara ótti. Erekshe deıtinimiz, alǵash ret qolǵa alynǵan egizder sherýine 48 egiz ben bir úshem qatysty. Sahnaǵa qol ustasa shyqqan 99 balanyń bári de ónerli eken. Dóńgelene bı bıledi, áýelete án saldy.
Mádenıet úıiniń dırektory Jalǵas Saǵyndyqovtyń aıtýynsha, bul – aýdan tarıhyndaǵy egizderdiń qatysýymen ótken alǵashqy is-shara. Sol sebepten egizder men úshemge erekshe qurmet kórsetildi.
– Bul sherýdi ótkizýdegi basty maqsatymyz – aýdandaǵy egizderdi jurtshylyqqa tanystyrý. Sóıtip, egizderdi kórsetý arqyly turǵyndardyń kópbalaly bolýǵa yntasyn oıatýdy kózdedik. Budan bylaı egizder men úshemniń arasynda shynaıy dostyq nyǵaıyp, bir-birimen aralasyp turǵanyn qalaımyz, – deıdi J.Saǵyndyqov.
Egizder men úshemge tili dám úıiretin táttiler men «Tamasha» oıyn-saýyq keshenine sertıfıkat berildi.
Atyraý oblysy
