Aldaǵy senbi kúni Astanadaǵy «Ulttyq tennıs ortalyǵynda» Kásipqoı tennısshiler qaýymdastyǵy (ATP) uıymdastyratyn ATP 500 sanatyndaǵy jyldyń eń sońǵy týrnıri – Astana Open básekesiniń jalaýy jelbireıdi. Negizi tennısshilerdiń bul dodasy jospar boıynsha Qytaıda ótýge tıis edi. Alaıda ATP bıyl Qytaı jerinde ótetin barlyq týrnırdi keri qaıtaryp aldy. Sóıtip, 2004 jyldan beri Beıjińde ótkizilip kelgen jarys bıyldan bastap Qazaqstan astanasyna kóshirildi. Osylaısha, buǵan deıin elordada eki ret ótken ATP 250 jarysynyń mártebesi joǵarylap, ATP 500 týrnırine aınaldy.
Astanadaǵy týrnırdiń mańyzdylyǵyna toqtalmaı turyp, aldymen túsinikti bolý úshin ATP 250 men ATP 500 jarysynyń aıyrmashylyǵy qandaı, Kásipqoı tennısshiler qaýymdastyǵy (ATP) jylyna qansha tennıs týrnırin uıymdastyrady, bulardan bólek taǵy qandaı jarystar bar, tennısshiler ózderi qatysatyn týrnırdi qalaı tańdaıdy degen sııaqty oqyrmandardy qyzyqtyratyn suraqtarǵa az-kem jaýap bere keteıik.
Jalpy, Kásipqoı tennısshiler qaýymdastyǵynyń kúntizbesine saı, jylyna ártúrli sanattaǵy 800-ge jýyq tennıs týrnıri ótedi. Sonyń ishinde ATP aralasatyn eń negizgi týrnırlerge toqtalar bolsaq, qaýymdastyq bir jyl bederinde úzdik tennısshiler baq synaıtyn «Úlken dýlyǵa» sanatyndaǵy eń iri tórt jarystyń (Aýstralııa ashyq chempıonaty, Fransııa ashyq chempıonaty, «Ýımbldon», AQSh ashyq chempıonaty), ATP Master 1000 (9 týrnır), ATP 500 (13 týrnır) jáne ATP 250 (40 týrnır) básekeleriniń ótkizilýine tikeleı atsalysady.
ATP osy jarystardyń dárejesine qaraı reıtıngtik upaılardy da belgileıdi. Aıtalyq, «Úlken dýlyǵa» sanatyndaǵy barlyq jarystyń jeńimpazyna 2000 upaı berilse, keıingi deńgeıdegi týrnırlerde báseke ataýyna baılanysty upaılardy úlestiredi. Máselen, ATP Master 1000 týrnırinde top jarǵandar 1000 reıtıngtik upaıdy qorjynyna salsa, ATP 500-de úzdik shyqqan tennısshi 500 upaıǵa ıe bolady. ATP 250 dodasynda da dál solaı. Jeńimpaz sportshy óz reıtıngine 250 upaı qosady.
Týrnırdiń qarjylaı syıaqysy da jarystyń deńgeıine qaraı belgilenedi. «Úlken dýlyǵa» sanatyndaǵy bıylǵy jarystardyń jalpy júlde qory – 35-71 mıllıon AQSh dollary aralyǵynda boldy. ATP Master 1000 jarystaryna qatysqan tennısshilerge 6 jáne 10 mıllıon AQSh dollary kóleminde qarjylaı syıaqy úlestirildi. ATP 500 sanatyndaǵy týrnırlerdiń júlde qory 1,5-4 mıllıon AQSh dollary aralyǵynda bolady. Resmı derekterde Astana Open ATP 500 týrnıriniń júlde qory 3,728,045 AQSh dollaryn quraıdy delinip otyr. ATP 250 uıymdastyrýshylary 1 mıllıon AQSh dollary kóleminde qarjylaı syıaqy taǵaıyndaıdy.
Mine, osy jaıttardan keıin-aq qaı týrnırdiń bási joǵary ekenin, tennısshiler kóbine qaı jarysty tańdaıtynyn ańǵarýǵa bolady. ATP reıtınginiń alǵashqy júzdiginde turǵan tennısshiler mindetti túrde «Úlken dýlyǵa», ATP Master 1000, ATP 500 sanatyndaǵy týrnırlerge qatysýǵa tyrysady. Sebebi atalǵan jarystarda reıtıngtegi upaı sanyn da, qarjylyq jaǵdaıyn da jaqsartyp alýǵa tolyq múmkindik bar. Máselen, qazirdiń ózinde elordadaǵy Astana Open ATP 500 týrnırine jýyrda ǵana AQSh ashyq birinshiliginde top jarǵan, qazirgi tańda erler arasyndaǵy álemdik reıtıngte birinshi orynda turǵan ıspanııalyq Karlos Alkaras, sondaı-aq ár jyldary «Úlken dýlyǵa» týrnırlerinde bas júldeni jeńip, ATP reıtınginde kósh bastaǵan serbııalyq Novak Djokovıch, reseılik Danııl Medvedev, horvatııalyq Marın Chılıch, Olımpıada chempıondary – shveısarııalyq Stanıslas Vavrınka (Beıjiń, (2008) jáne brıtanııalyq Endı Marreı (London (2012), Rıo (2016) syndy tennısshiler qatysatyndaryn málimdedi. Sonymen qatar reıtıngtegi TOP-10 sportshynyń beseýi, TOP-20 qataryndaǵy taǵy bes tennısshiniń elordaǵa keletini belgili boldy.
Juptyq synda da «Úlken dýlyǵa» dodasynyń birneshe chempıony oınaıdy. Jankúıerler dúnıejúzilik reıtıngte kósh bastaǵan Djo Solsberı (1 ATR), Radjıv Ram (2 ATR), Nıl Skýpskı (3 ATR), Veslı Kolhof (4 ATR), Jan-Jıýlen Roıer (5 ATR), Marselo Arevalo
(6 ATR), horvatııalyqtar – Nıkola Mektıch/Mate Pavıch, qolýmbııalyqtar Robert Farah/Hýan Sebastıan Kabal men taǵy basqa tennısshilerdiń ónerin tamashalaı alady.
О́z jerimizde ótetin halyqaralyq dodada qazaqstandyq tennısshilerden elimizdiń birinshi raketkasy Aleksandr Býblık negizgi kezeńde oınasa, reıtıngte tómen turǵandyqtan, ulttyq quramanyń bedeldi múshesi Mıhaıl Kýkýshkın ýaıld kard (arnaıy shaqyrtý) arqyly qatysady. Sondaı-aq Denıs Evseev, Beıbit Juqaev, Grıgorıı Lomakın, Dmıtrıı Popko Qazaqstan chempıonaty barysynda Astana Open dodasynyń irikteý saıystaryna joldama alý úshin baryn salady. Al juptyq synda Andreı Golýbev pen Aleksandr Nedovesov óner kórsetedi.
Jalpy, Astana Open ATP 500 týrnıri – Qazaqstanda ótkeli turǵan ATP sanatyndaǵy eń iri týrnırdiń biri bolsa, Sary qurlyq aımaǵyndaǵy úshinshi jarys sanalady. Azııadaǵy ATP 500 serııasy boıynsha osyǵan deıingi iri jarys Dýbaıda (Dubai Tennis Championships) ótse, endi Astana Open dodasymen bir mezgilde Rakuten Japan Open Tennis Championship týrnıri de uıymdastyrylady.
