Aglomerasııalyq seh Aqsý ferroqorytpa zaýytynyń «eń jas» bólimshesi bolyp sanalady. Sondaı-aq barynsha qaldyqsyz óndiriske kóshýge baǵyttalǵan ERG-diń eń aýqymdy ınvestısııalyq jobalarynyń biri.
2010 jyly iske qosylǵan seh burynnan qordalanǵan qaldyqtardy óńdeı bastaǵan. Usaq fraksııaly shıkizat balqytý peshterine jaramsyz sanaldy ári ony buryn úıindi retinde saqtaı bergen. Al qazir aglomerasııalyq mashına usaq kendi bir-birine biriktirip, balqytý peshterine arnalǵan daıyn ónim – aglomerat shyǵarýda. Osy jerde Aqsý jáne Aqtóbe ferroqorytpa zaýyttarynyń gaz tazalaý qurylǵylary qarmap alǵan shańdar da óndiriske qaıta baǵyttalatynyn atap ótken jón.
– Aqsý ferroqorytpa zaýytynda álemdik ekologııalyq standarttarǵa umtyla otyryp, qaldyqsyz óndiris tehnologııalary sátti qoldanylyp keledi. Bul jerde qojdy qaıta óńdeý sehy men aglomerasııalyq sehtyń septigi zor. Sońǵysyn «ekologııalyq eń taza bólimshe» dep ataýǵa bolady. Sebebi aglomerat óndirisine buryn paıdasyz bolǵan usaq-túıekti baǵyttap qana qoımaı, tek jaǵylyp, aýaǵa ushqan ferroqorytpa gazy da paıdaǵa asa bastady, – deıdi kásiporyn dırektory Valentın Chıhıchın.
«Qazhrom» transulttyq kompanııasynda aglomerasııalyq sehtyń ónimdiligin arttyrý úshin qaıta qurý baǵdarlamasy ázirlendi. Aldyn ala esepteýler boıynsha ony júzege asyrýǵa 2 mlrd teńgeden astam qarajat jumsalady eken. Alaıda osy mańyzdy bólimsheniń tıimdiligin arttyrýǵa qyzmetkerlerdiń ıdeıalarynyń septigi tıgen. Olar ERG-diń ǵylymı-zertteý ınjınırıng ortalyǵymen birlesip, óndiris tehnologııasyna da, jabdyqqa da birqatar ózgeris engizipti. Atap aıtqanda, konveıerlik taspany ystyqqa tózimdi taspaǵa aýystyrý jáne daıyn aglomerat jelisin jetildirý nátıjesinde aglomerasııa mashınasynyń jyldamdyǵy artqan. Al shıkizat quramyna jańa komponentti qosý nátıjesinde birigý jyldamdyǵy ulǵaıǵan.
– Birlese áreket jasap, biz aglosehtyń ónimdiligin jylyna 50 myń tonnaǵa deıin arttyra aldyq. Biraq shegine áli jetken joqpyz. Bul – joba komandasynyń alǵashqy úlken jeńisi. Aldyn ala baǵalaý boıynsha úsh bastamany engizýdiń paıdasy shamamen 5,6 mlrd teńge bolmaq. Alaıda ıdeıalarymyz munymen taýsylmaıdy. Osy baǵyttaǵy jumysty odan ári jalǵastyramyz, – deıdi aglomerasııalyq sehtyń basshysy Dmıtrıı Polıakov.
Eske sala keteıik, búgingi tańda Aqsý ferroqorytpa zaýytynyń aglomerasııalyq sehy – hrom jáne marganes aglomeratyn shyǵaratyn álemdegi jalǵyz óndiris oshaǵy.
