Qulshylyq úıine ǵulama-ǵalym, din qaıratkeri Ahmetsafa qajy Qaldybaıulynyń atyn berý sheshimi tekten-tek qabyldanǵan joq. Ol uzaq jyl qaladaǵy Tynybaı meshitinde qyzmet etken.
«Qazaqstan musylmandary dinı basqarmasy qazaqtyń arǵy-bergi tarıhynda aty qalǵan, táýelsizdik jolynda kúresken azamattardyń esimin meshitterge berip keledi. Bul qulshylyq úıine ǵulama-ǵalym, din qaıratkeri Tynybaı meshitinde talaı jyl ımam bolǵan Ahmetsafa qajy Qaldybaıulynyń atyn berip otyrmyz.
Babalarymyz «Azany bar aýyl azbaıdy» degen. Sondyqtan meshit – taǵylym men tárbıeniń orny. Jaratqannyń razylyǵyn alý maqsatynda aǵa-baýyrlarymyz osyndaı kelbetti ǵajap meshitti dinı basqarmaǵa tartý etip otyr. Alla saýaptan jazsyn», dedi Qazaqstan musylmandary basqarmasynyń tóraǵasy.
Ahmetsafa haziret Semeıdegi «Tynybaı» meshitinde 1954-1973 jyldar aralyǵynda ımam bolyp qyzmet etken. Qyzmet etken jyldary meshitke kúrdeli jóndeý jumystaryn júrgizip, qulshylyq úıine jańa dem berdi. El alǵysyna bólengen ǵalym sanaly ǵumyryn dinge qyzmet etýge arnaǵan. Ahmetsafa qajynyń uly Muzafar jıylǵan jamaǵatqa rızashylyǵyn bildirip, ákesi ustaǵan Quran men kıgen shapan-sáldesin múftııat mýzeıine tabystady.
Bul oraıda 5 myńdaı turǵyny bar Stepnoı kentinde buryn meshit bolmaǵanyn aıta ketken oryndy. Jańa meshit 100 adamǵa arnalǵan.
Sondaı-aq bas múftı Semeıde uıymdastyrylǵan «Qazynaly qarııa – danalyq pen parasat ıesi» óńirlik aqsaqaldar forýmyna qatysyp, delegattar óskeleń urpaq tárbıesi, ımandylyqty kúsheıtý, salt-dástúrimiz ben memlekettik tildiń qoldanys aıasyn keńeıtýge baılanysty oılaryn ortaǵa saldy.
«Qazaq halqy aqsaqalǵa qashan da úlken qurmetpen qaraıdy. Qazynaǵa balap, bata suraǵan. Qurmet kórsetip, tórin bergen. Bizge dástúrdi saqtap, ataly sózge toqtap, bataly iske jumylatyn jastar kerek. Urpaǵymyz Uly Abaıdyń ósıet sózin qasıetine balap ósse, keleshegimiz kemel, bolashaǵymyz baıandy bolady. Ol úshin jastarǵa sapaly bilimmen qosa, sanaly tárbıe berýdiń mańyzy erekshe. Osy oraıda Muhtar Áýezovtiń «El bolamyn deseń, besigińdi túze» degen sóziniń tereń mánine qaıran qalasyń. Tárbıe tal besikten bastalsa, balalarymyz shejire tarıhty boıyna sińirip, erlik, órlik rýhta ósse, urpaǵymyzdyń ómir báıgesindegi alar orny tór bolady degen úmittemiz», dedi Abaı oblysynyń ákimi Nurlan Uranhaev.
QMDB tóraǵasy bala tárbıesindegi babalar jolyna toqtalyp, ulaǵatty urpaqty qalyptastyrýdaǵy aqsaqaldardyń róli jaıly pikirin jetkizdi.
«Qazaq «Kóp jasaǵannan emes, kópti kórgennen sura» deıdi. Qarttyq jaspen emes, kórgen-bilgen, túıgenmen ólshenedi. Al aǵa býynnyń osy ýaqytqa deıin kórgen-túıgeni talaı jasqa jyldar boıy azyq bolary sózsiz. О́mir mektebiniń san túrli satysynan ótip, kórgenin kókeıge túıgen aqsaqaldardyń keńesi aýadaı qajet. Sebebi biz bolmysymyzdan bir sózben erdiń qunyn keshirgen, qaı zamanda da júıeli sózge toqtaǵan halyqpyz. Sol sebepti sizderdi el múddesi úshin birigip qyzmet etýge shaqyramyn», dedi N.Taǵanuly.
Forýmda Jabal Erǵalıev, Abdýlla qajy Joldas, Manarbek Muhametjanov, Asan Omarov, Rashıd Bektemirov, Zeınolla Toqaev syndy elimizge belgili azamattar da urpaq tárbıesine qatysty oramdy oılarymen bólisti.
Budan basqa múftııat ókilderiniń qatysýymen Semeıde Abaı Qunanbaıuly ortalyq meshitine aparatyn jaıaý júrginshiler kópiri ashyldy. Jaıaý júrginshiler kópiri meshittiń kelbetin ashyp, meshitke keletin halyqtyń qaýipsizdigin qamtamasyz etedi. Qazir munda medrese men qatymhananyń qurylysy júrip jatyr. Ony 2023 jyldyń qyrkúıek aıynda paıdalanýǵa berý josparlanǵan.
SEMEI
