Zeınet jasyna jaqyndap qalsa da, Shahnoza Asılına eki ókpesin qolyna alyp, mektepte zyr júgirip júredi. Onyń jarqyn shyqqan daýysy dálizde ketip bara jatqan adamdy selt etkizbeı qoımaıdy. Bar ynta-shyntasymen berilip, oqýshylarynyń sanasyna bilim nuryn quıyp jatqan ustazdyń mamandyǵyna degen adaldyǵyna razy bolmaý múmkin emes.
«Rasynda, «Basqalardy úırete otyryp, ózimiz de úırenemiz» degen sózdi Seneka tekke aıtpaǵany daýsyz. Árbir oqýshymen jeke jumys istegen ustazdyń isi alǵa basady. О́ıtkeni ár bala – jeke bir álem, bólek psıhologııa. Oqýshynyń ishki álemine úńilseń ǵana bolmysymen tanysa túsesiń. Nashar ustaz bolýy múmkin, biraq jaman oqýshy bolmaıdy. Onyń oqýǵa degen zeıinin, bilimge degen qushtarlyǵyn ashý jolynda ustazdar jańa ádistemelik tásilderdi sátimen paıdalanǵany jón. Muǵalim jańashyldyqqa umtylmasa, oqý prosesi kezinde bilim alýshylardyń qyzyǵýshylyǵyn oıata almasa, bári beker», deıdi ol.
Búginde alpystyń asqaryna shyqqan ustaz kezinde Reseıdiń Tambov memlekettik ınstıtýtynda orys tili pániniń muǵalimi mamandyǵy boıynsha bilim alǵan. 1985 jyly joǵary oqý ornyn aıaqtaǵan ol ózi túlep ushqan Aqyrtóbe aýylyna kelip, aýyl balalaryna sabaq beredi. 1987-1990 jyldary aýdandyq komsomol komıtetiniń III hatshysy, 2003-2013 jyldar aralyǵynda Qulan aýylyndaǵy Shoqan Ýálıhanov atyndaǵy orta mektepte dırektordyń oqý isi jónindegi orynbasary qyzmetin abyroımen atqardy. Qazirgi tańda atalǵan mektepte orys tili men ádebıeti pániniń muǵalimi retinde eńbek jolyn jalǵastyryp júr.
Bilim salasynda 35 jyldan astam ýaqyt boıy úzdiksiz eńbek etip kele jatqan ustazdyń maqsaty da aıqyn. Ol jumysyna shyǵarmashylyq izdenispen qaraǵandy maqul kóredi. Sol arqyly balalardyń arasynda da shyǵarmashylyq orta qalyptastyrýǵa kúsh salyp keledi. Kóptegen ıntellektýaldyq jobaǵa qatysyp, úzdikterdiń qatarynan kóringen ulaǵatty ustaz qarapaıym qalpynan tanǵan emes. Alaıda qarapaıymdylyq qarabaıyrlyq emes. О́ıtkeni izdengen adam muratyna jetetinin, jalqaýdyń keri ketetinin jaqsy biledi.
Meıirimdi muǵalimniń «Bilim sapasyn arttyrý: jańa ıdeıalar, jańa tásilder» taqyrybynda ótken konferensııaǵa ázirlegen eńbegi ǵylymı jınaqqa ense, birer jyl buryn taǵy bir jazbasy halyqaralyq «Mır ýchıtelıa» portalynda jarııalanyp, mamandar tarapynan qyzý talqyǵa tústi. Muǵalimniń eńbegi elenip, úzdik ustaz retinde arnaıy marapattarǵa da ıe boldy.
Aıta bersek, Shahnoza Asılınanyń qol jetkizgen jetistikteri az emes. Úzdik ustazdar arasyndaǵy iri baıqaýlarda san márte top jardy. Qazaq jáne orys tilderinde jaryq kóretin respýblıkalyq, halyqaralyq jáne salalyq basylymdarda kóptegen ǵylymı eńbegi jarııalanyp, keı jaǵdaıda jazbalary úshin túrli dárejede marapattaldy.
Otyz jyldan astam eńbeginiń elengeni shyǵar, birer jyl buryn burynǵy Bilim jáne ǵylym mınıstrligi bilim jáne ǵylym salasyndaǵy jetken tabysy úshin ulaǵatty ustazdy Ybyraı Altynsarın atyndaǵy tósbelgimen marapattady.
«Oqýshylarymnyń bárin maqtan tutamyn. Olardyń biri ozdy, biri kóshten qalyp jatyr deýge bolmaıdy. О́ıtkeni adam balasy kez kelgen sátte ózin basqa qyrynan kórsetýi yqtımal. Jalpy, muǵalim bitken ustazǵa ustanym, balaǵa meıirim kerek ekenin qaperden shyǵarmasa deımin. Úıinde ata-anasynyń, mektepte ustazdarynyń meıirim-qaıyrymyna qanyǵyp ósken oqýshydan jaman azamat shyǵýy múlde múmkin emes», deıdi Shahnoza Asılına.
Jambyl oblysy,
Turar Rysqulov aýdany
