«Bizderde mynadaı bar, mynadaı bar»

Keıingi jyldary Qazaqstannyń týrızmi Japonııa úshin perspektıvaly jáne maqsatty naryqtyń birine aınalyp keledi. Buǵan Qazaq­stannyń elge keletin Ja­ponııa týrısterine vızasyz rejim ornatylǵany sebep bolyp otyr. Halyq sany jaǵynan álemde 11-orynǵa ıe Japonııanyń (126 mln) 16-18 mln azamaty jyl saıy­n shetelge saıahattaıdy eken. Sondaı-aq olar basqa sheteldiń týrısterine qaraǵanda saıahattarynda ortasha eseppen 2-3 ese kóp qarjy jumsaıdy. Japonııa syrtqy týrızmin damytý jyldamdyǵy bo­ıyn­sha álemde 15-oryn, halyq­aralyq týrızmge jumsalǵan shy­ǵyndar boıynsha 4-oryn alady.

Japonııanyń Qazaqstanǵa qaraǵanda aýmaǵy áldeqaıda kishi jáne el ishinde taý kóp bol­ǵan­dyqtan, olardy Qazaqstannyń keń dalasy, ózen men kóli, tumsa tabıǵaty qyzyqtyrady. Saıahat kezinde japondar elimizdiń ár aı­maǵyndaǵy kórikti jerler beınelengen kádesyılardy satyp alýdy jón kóredi eken.

Sonymen qatar keıingi jyldary Japonııanyń halyqaralyq yntymaqtastyq agenttigi (JICA) Qazaqstan, Qyrǵyzstan, Tájikstan, Túrikmenstan, О́zbekstan sekildi Ortalyq Azııa elderiniń týrızm salasyn ilgeriletý boıynsha ylǵı qoldaý kórsetip keledi.

О́ńirlik týrızmdi ilgeriletý jónindegi bastamalardyń biri retinde JICA Tokıodaǵy Tourism Expo Japan 2022 kórmesinde joǵarydaǵy bes memlekettiń ta­nys­­tyrylymyn bir stend aıa­sy­na biriktirip, aqysyz negiz­de uıym­dastyryp berdi. Halyq­ara­lyq kórmede Qazaqstan delegasııasy kelýshilerge ulttyq taǵamdarymyz ben mádenıetimizdi tanystyrdy.

«Biz úshin Ortalyq Azııa el­derimen birlesken stendke qa­tysý úlken tájirıbe. Degenmen, ár el óz ereksheligin kórsetý ar­­qyly, óz eliniń týrızmin tanystyrdy. Qýanarlyǵy, Qazaq­stan­nyń stendi týrıster eń kóp kelgen nysandardyń birine aı­naldy. Qazaqstanǵa degen qyzy­ǵýshylyqtyń joǵary bolýyna baılanysty, elimizdi tanystyrýǵa barǵan týroperatorlardyń bos ýaqyty múldem bolǵan joq. Ja­po­nııanyń shyǵys baǵytynda ju­mys isteıtin týrkompanııalarymen únemi kelissóz júrgizip otyrdy», deıdi Kazakh Tourism Ulttyq kom­pa­­nııa­synyń tóraǵasy Talǵat Aman­baev.

Qazaqstandyq týroperator­lar­dyń osy bir aıtýly kórmege qa­tysýy elimizdiń týrıstik áleýe­tin ǵana emes, salt-dástúrin, máde­­nıetin tanýdy arttyrýǵa, shetel­dik aýdı­torııany Ádiletti Qazaq­stanmen ta­nys­tyrýǵa múmkindik berdi.