Sýretti túsirgen Erlan OMAR, «EQ»
Kelisimge «Qazaqstan halqyna» qorynyń basqarma tóraǵasy Bolat Jámishev pen «Arman Holding» halyqaralyq kompanııasynyń prezıdenti Serikbaı Bısekeev Astana qalasynda ótken «Digital Bridge 2022» sıfrlyq tehnologııalar jáne bızneske arnalǵan halyqaralyq forým aıasynda qol qoıdy. Jobany iske asyratyn seriktes – holdıng quramyna kiretin «Arman Injınırıng» JShS.
Yntymaqtastyq «Qazaqstan halqyna» qory ázirlegen «Bolashaq ınjenerler» qaıyrymdylyq jobasynyń iske asyrylýynyń bastamasy bolmaq. Jobanyń maqsaty – robottehnıkany zerdeleý úshin aýyldyq jerlerde, shaǵyn qalalar men monoqalalarda balalarǵa jaǵdaı jasaý, ınjenerlik quzyretter salasynda qoljetimdi sapaly bilim berý ortasyn qamtamasyz etý.
«Aýyldyq jerler men monoqalalarda bilim berýdi damytýdyń mańyzy zor. Sondyqtan balalarǵa robottehnıkany, baǵdarlamalaýdy úırenýge jáne ınjenerlik daǵdylardy damytýǵa múmkindik beretin qajetti jobany iske asyryp jatyrmyz», dep atap ótti «Qazaqstan halqyna» qorynyń basqarma tóraǵasy B.Jámishev.
Jobanyń 2022-2026 jyldarǵa arnalǵan bıýdjeti 1 mlrd 339 mln 668 myń teńge, onyń ishinde «Qazaqstan halqyna» qory 673 mln 200 myń teńge, Injenerlik bilim berýdi damytý qory 464 mln 508 myń teńge baǵyttasa, jergilikti atqarýshy organdardyń qarajatynan 201 mln 960 myń teńge bólinedi. Robottehnıka kabınetteri Qazaqstannyń barlyq oblysyndaǵy aýyldarda, aýdandar men monoqalada jaraqtandyrylady. 1-6 synyp oqýshylary baǵdarlamalaý, qurastyrý, mehatronıka, elektrtehnıka jáne basqa da baǵyttar boıynsha bilim alady.
«Arman Holding halyqaralyq kompanııasy búkil álemge arnalǵan ónimder men jobalardy daıyndaýda. Bolashaqtyń jańa daǵdylaryn barsha azamatqa, ásirese shalǵaı aýyldar men monoqalalardaǵy balalar úshin beıimdep, ana tilimizde qoljetimdi etetinimizge qýanyshtymyn», dedi «Arman Holding» prezıdenti Serikbaı Bısekeev.
«Qazaqstan halqyna» qoǵamdyq qory robottehnıka kabınetterin konstrýktormen jáne baǵdarlamalyq qamtamasyz etýmen jabdyqtaıdy. Injenerlik bilim berýdi damytý qory uıymdastyrý máselelerimen aınalysady, al «Arman Injınırıng» JShS bilim berý salasyna arnalǵan robottehnıkalyq sheshimderdiń otandyq óndirýshisi retinde robottehnıka kabınetterin jóndeý men rásimdeýdi, jıhazben jáne oqý-ádistemelik keshenmen jabdyqtaýdy, oqytýdy uıymdastyrý men mektep pedagogterin ádistemelik qoldaýdy qarjylandyrady.
Jobaǵa elimizdiń 187 mektebi, onyń ishinde 160 aýdandyq jáne 27 monoqala mektepteri qatysady. Sondaı-aq memorandým aıasynda taraptar «Bolashaq ınjenerler» jobasyn damytýdyń Jol kartasyn ázirledi. Joba kelesi oqý jylynda iske qosylady dep josparlanyp otyr.
