Sońǵy kúnderi qalyptasqan jaǵdaıǵa baılanysty Batys Qazaqstan oblysy aýmaǵyndaǵy 6 shekaralyq keden beketi Reseıden kelip jatqan mıgranttar tasqynynyń astynda qaldy. Resmı málimetterge qarasaq, 21 qyrkúıekten beri ótken bir apta ishinde oblys aýmaǵyna 6283 Reseı azamaty kelgen eken. Bul Reseı Federasııasynan 2021 jyly 12 aıda kelgender sanynan artyq.
Mundaı jaǵdaıda ne isteý kerek?!
Batys Qazaqstan oblysy ákimdiginde shekara máseleleri jónindegi úılestirý keńesi qurylyp, qazir qalyptasqan jáne bolashaqta bolýy yqtımal qıyndyqtar men túıtkilderdi talqylap, naqty sheshimder qolǵa alynyp jatqanyn budan buryn habarlaǵan bolatynbyz.
«Reseıden kelip jatqan mıgranttar tasqyny tolyq baqylaýda, shekaradan ótken sheteldikter máselesine monıtorıng jasalyp otyr. О́ńirde qoǵamdyq tártip saqtalýy úshin sharalar qolǵa alyndy. Qazaqstan men Reseı arasyndaǵy Syrym, Shaǵan, Tasqala keden beketterinde táýlik boıy kezekshilik uıymdastyryldy. Ol jerde 35 adam qyzmet atqarýda. Oblys ortalyǵynda jáne óńirde azyq-túlik baǵasy baqylanyp, iri saýda oryndary men bazarlarda kún saıyn tekserý júrgiziledi», degen edi Batys Qazaqstan oblysy ákiminiń orynbasary Baqytjan Narymbetov.
Shekaradaǵy uzyn-sonar kezek eki el arasynda qarym-qatynas jasap júrgen Qazaqstan azamattaryna da qıyn tıdi. Olar bizdiń elge aǵylǵan reseılik mıgranttarmen bir kezekte turyp, birneshe táýlik joǵaltqan. Oraldyń arasynda Eýropadan, Reseıden júk alyp kele jatqan otandyq kásipkerler de az emes.
- Qazirgi ýaqytta eń mańyzdy másele – Reseımen shekaradaǵy Qazaqstan azamattaryn elge qaıtarý. О́ńir basshysy Ǵalı Esqalıev Reseı shekara vedomstvosymen birge shekara qyzmeti departamentine bizdiń azamattarymyzǵa kómek kórsetý boıynsha máseleni sheshýdi tapsyrdy. Sondaı-aq oblys ákimi osy problemany sheshý boıynsha Qazaqstan Úkimetine usynystar jiberdi, olar qazirdiń ózinde jedel túrde qaralýda, - dedi Baqytjan Haberuly.
Taǵy bir mańyzdy mindet – Batys Qazaqstan oblysy aýmaǵynda qalǵan Reseı Federasııasy azamattaryn der kezinde esepke alý máselesi. Zań boıynsha sheteldikterdi qabyldaýshy tarap ol azamattar jóninde úsh táýlik ishinde polısııa organdaryna habarlaýy tıis. Sondyqtan kóshi-qon qyzmeti jergilikti halyq pen mıgranttardyń quqyqtary men jaýapkershiligine baılanysty túsindirý jumysyn kúsheıtip, qajetti aqparat SMS arqyly taratyldy. Sondaı-aq polısııa departamenti men memlekettik kirister departamenti páterin zańsyz jalǵa berip otyrǵan turǵyndardy anyqtap, zańnamaǵa sáıkes sharalar qabyldaýǵa kiristi. Sıfrlyq tehnologııalar basqarmasynyń qyzmet bazasynda kóshi-qon zańnamasy máselesi boıynsha mıgranttar men jalǵa berýshilerge 109 nómiri boıynsha keńes berýdi uıymdastyrdy.
О́ńir basshysy Qazaqstan azamattarynyń da, kóship-qonýshylardyń da qaýipsizdigin qamtamasyz etý qajettigin erekshe aıtty. Sondyqtan polısııa departamentiniń jeke quramy kúsheıtilgen rejımge kóshirildi. Oblys ákiminiń orynbasary Baqytjan Narymbetov Batys Qazaqstan oblysy aýmaǵynda qoǵamdyq tártipti qamtamasyz etý, quqyq buzýshylyqtyń aldyn alý jáne boldyrmaý maqsatynda qurylǵan halyq jasaqtaryn polısııa departamentiniń qaramaǵyna jiberdi.
Qazirgi tańda eriktilerden qurylǵan birneshe top oblys ortalyǵyndaǵy alań, parkterge baqylaý jasap, monıtorıng júrgizýde. Oblystaǵy eriktiler Reseıden kelgenderge temirjol jáne avtobýs beketinde, «Dına» sýpermarketinde kómek kórsetý oryndaryn uıymdastyryp, qolushyn berýde. Mıgranttardy shekaradan Oralǵa jáne odan ári jetkizý oryndaryna deıin tasymaldaý júrgizilýde. Oblys eriktileriniń bastamasymen «Atameken» jáne «Samal» jazǵy lagerleriniń bazasynda kelýshilerdi aqyly túrde qabyldaý pýnktteri (barlyǵy 330 oryn) uıymdastyryldy.
Saraptamaǵa qaraǵanda Batys Qazaqstan oblysy aýmaǵyna kelgen sheteldikterdiń basym bóligi odan ári basqa óńirlerge ketip jatyr. Sondyqtan áleýmettik jelilerde elimizdiń basqa óńirlerine júretin turaqty avtobýs marshrýttarynyń qozǵalys kestesi, jolaqy baǵasy týraly aqparat taratyldy. Mysaly, qalyptasqan jaǵdaıǵa baılanysty Atyraý qalasyna jolaýshylar avtobýsy buryn kúnine bir márte júrse, qazir kúnine úsh ret qatynaýda.
«Sondaı-aq barlyq poıyz baǵyttaryna qosymsha vagondar tirkeý, áýe reısterin kóbeıtý jóninde tıisti mınıstrlik pen «Qazaqstan temir joly» ulttyq kompanııasymen kelissóz júrgizip jatyrmyz. Qajet bolǵan jaǵdaıda monıtorıng jáne jedel sharalar qabyldaý úshin derbes shtab qurylatyn bolady. Oblys ákimi azyq-túlik tapshylyǵyna jol bermeýdi jáne taýarlardyń turaqty bolýyn qamtamasyz etýdi tapsyrdy. Sol sebepti azyq-túlik baǵasyn tekserý jáne deldaldardy anyqtaý maqsatynda monıtorıngtik toptar jumystanýda», deıdi Baqytjan Narymbetov.
