«Aýyl» HDP partııasynyń tóraǵasy Álı Bektaev kezekten tys ótetin prezıdent saılaýyna prezıdenttikke úmitker retinde partııanyń atynan Qazaqstan fermerler qaýymdastyǵynyń basqarma tóraǵasy Jıgýlı Moldahalyquly Daırabaevtyń kandıdatýrasyn sezd qaraýyna usyndy. Sezd delegattary usynylǵan kandıdatýrany qoldap, biraýyzdan daýys berdi.
«Aýyl» partııasy kezekten tys prezıdent saılaýy Jańa Qazaqstannyń qalyptasý jolyndaǵy mańyzdy kezeń bolady dep senedi. Sondyqtan da halyqtyq-demokratııalyq patrıottyq partııa 20 qarashada ótetin Qazaqstan Respýblıkasy Prezıdentiniń kezekten tys saılaýyna qatysatynyn málimdeıdi. Prezıdent saılaýyna kandıdat usynýy partııanyń elimizdegi irgeli qoǵamdyq-saıası uıymdardyń biri retinde Qazaqstan Respýblıkasy zańdarynda kórsetilgen quqyqtaryn qoldana otyryp, demokratııa prınsıpterine saı, memleket ómirindegi mańyzdy oqıǵalarǵa qatysýdaǵy sheshimi men erik-jigerin aıqyn tanytady. Prezıdent saılaýyna qatysý arqyly «Aýyl» partııasy óziniń jarǵysy men baǵdarlamasynda kórsetilgen maqsattaryn, strategııalyq mindetterin alǵa tartady», dep málimdedi partııa tóraǵasy Álı Bektaev.
«Alda Parlament Májilisi men barlyq deńgeıdegi máslıhattar depýtattarynyń saılaýy kele jatyr. Partııa kezekten tys saılaýdyń jarııalanýyn qazirgi kezeńde qalyptasqan kúrdeli geosaıası ahýalǵa baılanysty qabyldanǵan oń sheshim, elimizdiń birligi men turaqtylyǵyn saqtaýǵa baǵyttalǵan mańyzdy qadam dep sanaıdy. Saıası doda ashyq básekelestik pen árkimge teń múmkindikter usynatyn «halyq únine qulaq asatyn memleket» pen «Ádiletti Qazaqstan» tujyrymdamalaryn qalyptastyrý jolyndaǵy Memleket basshysynyń bastamalaryn júzege asyrýdyń negizgi alǵysharty bolmaq», dedi partııa músheleri.
Partııa sezinde delegattar elimizde ótken jalpyulttyq referendýmda otandastarymyz Memleket basshysy usynǵan konstıtýsııalyq reformalarǵa aıqyn basymdyqpen qoldaý bildirgenin aıtty. «Qazaqstanda memlekettiń saıası júıesin jetildirý baǵytynda aýqymdy is-sharalar júzege asyrylyp, el azamattarynyń áleýmettik turǵydan qamtamasyz etilýin jetildirý baǵytynda júıeli jumystar júrgizilip keledi. Azamattarymyzdyń ál-aýqatynyń sapaly ósýi memlekettiń ekonomıkalyq saıasatynyń negizgi maqsatyna aınaldy», dedi partııa jetekshisi.
Ol sondaı-aq «Aýyl» partııasy aldaǵy saıası dodaǵa qatysý arqyly aýyl turǵyndarynyń, eńbek adamdarynyń, adal eńbekkerlerdiń muń-muqtajyn qozǵap, múddesin qorǵaıtyn uıym retinde saıası ustanymyn taǵy bir márte dáleldeıtinin aıtty. Partııanyń bul ustanymdary «Aýyl» halyqtyq-demokratııalyq patrıottyq partııasynyń 2022 jylǵy 20 qarashadaǵy Qazaqstan Respýblıkasy Prezıdentiniń saılaýyna qatysý týraly málimdemesinde de aıqyn kórinis tapqan. «Aýyl – dástúrli qundylyqtarymyzdyń tamyry men bastaýy, ónegeli adamgershilik dástúrleriniń ózegi, halqymyzdyń tili men mádenı dińgegin saqtaýshy. «Aýyl» partııasynyń júz myńdaǵan múshesiniń arasynda kez kelgen daǵdarystan shyǵý úshin memlekettik strategııaǵa negizdelgen naqty baǵdarlamalaryn usyna alatyn, el ekonomıkasyn jańasha sapalyq deńgeıge kóterýge qabiletti, kásibı deńgeıi joǵary aýyl sharýashylyǵy salasynyń mamandary, ǵalymdar jáne áleýmettik sala mamandary jetkilikti. «Aýyl» halyqtyq-demokratııalyq patrıottyq partııasynyń basty maqsaty – saıası turǵydan turaqty, ekonomıkalyq turǵydan órkendegen, áleýmettik turǵydan ádiletti Jańa Qazaqstandy qalyptastyrýǵa atsalysý. Biz árbir qazaqstandyqty aldaǵy saılaýǵa qatysyp, elimiz úshin asa mańyzdy tarıhı kezeńde azamattyq belsendiligin tanytýǵa shaqyramyz!», delingen málimdemede.
