– Ǵumyryn muǵalim mamandyǵyna arnaǵandar el ishinde qashanda abyroıly. О́ıtkeni adam ómirde qandaı jetistikke jetse de onyń tulǵa retinde qalyptasýynda ustazdyń orny erekshe. Sonymen birge jas muǵalimderge mamandyqqa adaldyqty kórsetip, talmaı eńbek etip kele jatqan bilim salasynyń ardagerlerine rızashylyq bildiremiz. Sizderdiń eren eńbekterińiz ben mamandyqqa adaldyqtaryńyzǵa alǵysymyz sheksiz. Muǵalim mártebesine qatysty memleket tarapynan jasalǵan ilkimdi ister az emes. Keıingi úsh jylda muǵalimderdiń jalaqysy 75 paıyzǵa ósti. Sanatyna baılanysty tólenetin qosymsha 50 paıyzǵa deıingi tólemdi aımaqta muǵalimder qaýymynyń 60 paıyzy alady, – dedi oblys ákimi Jeńis Qasymbek.
Aýyldyq jerdegi bilim berý sapasy da nazarda. Sońǵy eki jylda oblysta 126 jas mamanǵa baspana berildi. Buǵan qosa jumysqa ornalasý kezinde 100 aılyq eseptik kórsetkish kóleminde kóterme qarajat berilip keledi.
Al «Qaraǵandy oblysy bilim berý salasynyń qurmetti pedagogi» atanǵandardyń árqaısysy óńir bilimin damytýǵa ólsheýsiz úles qosqan ustaz sanatynan, eńbek ótilderi 30 jylǵa jýyq.
Qaraǵandy oblysy bilim berý salasynyń qurmetti pedagogi qatarynda Qaraǵandy qalasy №61 jalpy bilim beretin mektebiniń qazaq tili men ádebıeti páni muǵalimi Dıdar Tórekeldına bar. 27 jyldan beri balalardy bilim nárimen sýsyndatyp keledi. Muǵalimdik jolyn 18 jasynda bastapty.
– Mektepten keıin ýnıversıtettiń fılologııa fakýltetiniń syrttaı bólimine tústim. Sol jyldary muǵalimder tapshy edi. Ýnıversıtette oqıtynym týraly anyqtamamen jumysqa alǵan-tyn. Sodan beri meniń ómirim balalarmen tyǵyz baılanysty. Osy jyldarda 20-dan astam oqýshym júldeli oryn ıelenip, túrli respýblıkalyq baıqaýda jeńiske jetti. Búgingi syılyǵymdy sol oqýshylaryma arnaımyn. Bul – bizdiń ortaq jeńisimiz. Ustaz eńbeginiń dáleli – shákirtiniń jetistigi, – deıdi D.Tórekeldına.
Shahtınsk qalasyndaǵy Álıhan Bókeıhan atyndaǵy mektep-lıseı dırektory Ararat Besmaǵanbetov te 26 jyldan beri ustazdyq degen uly qyzmette.
– 21 jasymnan ustazdyq jolyndamyn. Muǵalimdik – meniń sanaly tańdaýym. Jumys ońaı emes, árıne. Degenmen muǵalimdikti tańdaǵanyma ókingen emespin. Qazirgi tańda lıseıimizdiń oqýshylary túrli baıqaýlar men olımpıadalarda júlde ıelenip júr. Sondyqtan bul marapat – búkil ujym eńbeginiń nátıjesi, – deıdi A.Besmaǵanbetov.
Muǵalimder marapaty munymen shektelmeıdi. Oblystyń 10 muǵalimi bilim salasyndaǵy úzdik kórsetishi úshin oblys ákiminiń Qurmet gramotasymen marapattaldy. Alty pedagog «Ybyraı Altynsarın», bes muǵalim «Eńbek ardageri» jáne tórt pedagog «Bilim berý isiniń qurmetti qyzmetkeri» tósbelgilerine laıyq dep tanyldy.
Qaraǵandy oblysy
