Jelide Shyrshyqtaǵy zaýytta bolǵan jarylystyń vıdeolary tarap ketti. Oqıǵa 4 qazan kúni tańerteń bolǵan. Jarylys dúmpýinen jaqyn mańdaǵy turǵyn úılerdiń terezeleri synǵan.
Tótenshe jaǵdaılar mınıstrliginiń aqparat qyzmeti oqıǵaǵa qatysty aldyn ala málimet berdi. Alaıda habarda jarylystan zardap shekkenderdiń bar-joǵy týraly naqty málimet joq.
«4 qazan kúni saǵat 8:40-ta Tashkent oblysy Shyrshyq qalasynda ornalasqan «Maksam Chırchık» AQ kásipornynyń sıntezdeý sehynda jarylys bolǵany týraly habar kelip tústi.
Oqıǵa ornyna Tashkent oblysy Tótenshe jaǵdaılar departamenti basshylyǵy men qyzmetkerleri jáne arnaıy tehnıkalar keldi. Qazirgi ýaqytta qalyptasqan jaǵdaıdyń saldary joıylýda. Jaǵdaı baqylaýda», delingen habarlamada.
