Premer-Mınıstrdiń orynbasary – Saýda jáne ıntegrasııa mınıstri Serik Jumanǵarın «Eýrazııadaǵy klımattyń ózgerýine qarsy kúres: kómirtegi bırjalary jáne kómirtegi sharýashylyǵynyń bolashaǵy» atty halyqaralyq ınaýgýrasııalyq dıalog alańynda sóılegen sózinde fermerler is júzinde ónimniń taǵy bir túrin: aýyl sharýashylyǵy klımattyq jobalary boıynsha kómirtegi birlikterin óndirýshilerge aınalyp jatqanyn aıtty.
«Iri halyqaralyq agrokompanııalar kómirtekti praktıkaǵa kóshkeni úshin fermerlerge syıaqy tóleýdi kózdeıtin kómirtekti eginshilik baǵdarlamalaryn qalyptastyrýda. Halyqaralyq korporasııalar kómirtegi beıtaraptyǵyna qol jetkizý josparlaryn belsendi túrde jarııalap jatyr jáne esepterinde ofset dep atalatyn satyp alynǵan kómirtegi birlikteriniń kólemin kórsetedi. Ofsettiń eń iri satyp alýshylary – (Google, Microsoft) sıfrlyq alyptar, (Delta) áýe kompanııalary, (JPMorgan Chase, Goldman Sachs) ınvestısııalyq bankter. Naryqtyq tetiktiń tıimdi jumys isteý faktorlarynyń biri – kvotalaý sýbektileriniń, ıaǵnı shyǵaryndylary zańmen shektelgen kompanııalardyń ofsetterdi esepke alý múmkindigi. Bul turǵyda Qazaqstan kómirtegi birlikteri naryǵyn uıymdastyrýdyń neǵurlym ınklıýzıvti modeli boıynsha júre bastady: qazaqstandyq kompanııalardyń Qazaqstan aýmaǵynda iske asyrylyp jatqan klımattyq jobalar boıynsha naryqta satyp alynǵan ofsetterdi shekteýsiz esepteýge múmkindigi bar», dedi S.Jumanǵarın.
Ofsetterdi esepke alý shegi shekteýli. Mysaly, Qytaıdyń retteletin uıymdary ofsettermen belgilengen shyǵaryndylar kvotasynan 5%-dan aspaıtyn mólsherde ótemaqy tóleı alady.
«Alaıda qazirdiń ózinde Qytaıda da, Eýropalyq odaqta da kómirtekti ofsetter naryǵyn neǵurlym belsendi damytý týraly pikirtalas júrgizilip jatyr. Qazaqstannyń tájirıbesin áriptesterimiz eskeredi dep úmittenemiz», dedi ol.
Osylaısha, Qazaqstan kómirtegi birlikterin óndirý salasyn yntalandyrý jáne kómirtekti ofsetter naryǵyn qalyptastyrý boıynsha úlken qadam jasady.
Aıta ketelik, bıyl 3-7 qazan aralyǵynda «Astana» halyqaralyq qarjy ortalyǵy Úkimettiń qoldaýymen Halyqaralyq ınvestorlar aptalyǵyn gıbrıdti formatta ótkizip jatyr. Birlesip uıymdastyrýshylar men qatysýshylar qatarynda Halyqaralyq qoldanbaly júıeni taldaý ınstıtýty (IISUSA), BRIKS halyqaralyq básekelestik quqyq jáne saıasat ortalyǵy, TALAP qoldanbaly zertteýler ortalyǵy, Ulttyq ESG-klýby, GFC bar.
