Kúni keshe otandasymyzdyń isin júrgizetin Top Rank promoýterlik kompanııasy resmı túrde Jánibek Álimhanulynyń WBO beldigin qorǵaıtynyn málimdedi. Chempıondyq ataqqa úmitker boksshy – brıtanııalyq Denzel Bentlı (17-1-1, 14 KO). 1995 jyly Ulybrıtanııada dúnıege kelgen Bentlı 2017 jyldan beri kásipqoı boksta óner kórsetip júr. Osy ýaqytqa deıin 19 kezdesý ótkizgen brıtanııalyq boksshy 17 jekpe-jeginde jeńiske jetip, bireýinde jeńilip qalǵan. Taǵy bir aıqasy teń nátıjemen aıaqtalǵan. Al Jánibek ázirge jeńilistiń ne ekenin bilmeı kele jatqan Qazaqstandaǵy jáne orta salmaqtaǵy sanaýly boksshynyń biri.
Eki bylǵary qolǵap sheberi arasyndaǵy boks keshi 12 qarasha kúni AQSh-tyń Las-Vegas qalasyndaǵy Palms Casino Resort arenada ótedi. Álimhanuly men Bentlı keshtiń basty jekpe-jeginde judyryqtasady.
