«Qaraǵandy oblysy elimizdiń dál ortasynda ornalasqan. Ońtústik pen soltústikti jalǵaıtyn eń basty kúre jol osy óńirdi basyp ótedi. Aımaqty damytýǵa avtokólik joldarynyń sapasy aıryqsha yqpal etetini anyq. Qazir Ortalyq – Ońtústik kólik dálizi salynyp jatyr. Balqash qalasy arqyly ótetin joldyń qurylysy óte baıaý júrip, merzimi qaıta-qaıta keıinge qalýda. Úkimetke «Qaraǵandy – Balqash» jáne «Balqash – Býrylbaıtal» tas jolyn kelesi jyly salyp bitirýdi tapsyramyn», dedi Q.Toqaev.
Sonymen qatar ol «Qaraǵandy – Jezqazǵan» kúre jolynyń da mańyzyn atap ótti.
«Uzyndyǵy 500 shaqyrymnan asatyn jol jóndelse, ortalyq óńirlerge barys-kelis jaqsarady. Júk tasymaly kóbeıedi. Bul Ulytaý oblysyn damytýǵa zor septigin tıgizedi. Eki oblystyń ınvestısııalyq jáne týrıstik múmkindigin arttyrady. Osy joldy jóndeý jumysyna aldaǵy jyly dereý kirisý kerek», dedi Prezıdent.
Sondaı-aq «Qaraǵandy – Qarqaraly» tas jolyn jóndeýdi tapsyrdy. Memleket basshysynyń aıtýynsha, Qarqaralynyń týrıstik áleýetin arttyrý maqsatynda bul jumys aldaǵy eki jyldyń ishinde aıaqtalýy qajet.
