Gastroldik baǵdarlama úshin dál osy spektakldiń tańdap alynýy kezdeısoq emes. Sebebi 2022 jyly mýzyka álemi kórnekti horeograf Rostıslav Zaharovtyń týǵanyna 115 jyl tolýyn keńinen merekeleýde. A.Pýshkınniń «Baqshasaraı burqaǵy» poemasynyń negizinde horeograf Zaharov qoltańbasymen sahna kórgen áıgili týyndy – dramalyq balettiń úzdik nusqalarynyń biri ári aıtýly shyǵarmanyń bekzat óner tarıhynan alar orny aıryqsha.
Álem kórermeni tamsana tamashalaǵan balet avtorynyń bı ónerine, onyń ishinde burynǵy odaqtyq respýblıkalardyń ulttyq horeografııalyq ónerin qalyptastyrýǵa jáne damytýǵa qosqan úlesi zor. Eńbegi joǵary baǵalanǵan óner maıtalmany kezinde Qazaq KSR halyq ártisi joǵary ataǵymen marapattaldy. Aıtýly ataq Rostıslav Zaharovqa shákirti Dáýren Ábirovpen birge Abaı atyndaǵy MAOBT sahnasynda qoıǵan «Baqshasaraı burqaǵy», N.Tilendıevtiń «Dostyq jolymen» baletteriniń qoıylymy, sondaı-aq Máskeýdegi qazaq óneri on kúndiginiń qorytyndy konsertine daıyndyq pen «Altyn masaq» horeografııalyq kompozısııasy jáne taǵy da basqa ulttyq ónerge sińirgen eren eńbegi úshin berilgen bolatyn.
– Kreml saraıynyń tamasha sahnasynda óner kórsetetinimizge qýanyshtymyz. 2019 jyly trýppa munda Andrıs Lıepanyń qoıylymynda Mıhaıl Fokınniń «Sheherazada» baletin oryndaǵan bolatyn. Osy jolǵy saparda ártister sahnaǵa daıyndyqsyz shyqqaly otyr, sondyqtan bizdiń qobaljyp otyrǵanymyz sózsiz. Máskeýlik talǵampaz jurtshylyq dramalyq balet jaýhary – «Baqshasaraı burqaǵymen» jaqsy tanys, alaıda biz ony múlde basqa daıyndyqta usynamyz, dedi Reseıdiń halyq ártisi,«Astana Opera» balet trýppasynyń kórkemdik jetekshisi Altynaı Asylmuratova.
Kreml saraıy sahnasynda ótetin bul tańǵajaıyp óner oqıǵasynda talǵampaz kórermen álemdik balet juldyzy Altynaı Asylmuratovanyń «Astana Opera» ártisteriniń jańa býynyna óte uqyptap bere bilgen áıgili balettiń túpnusqasyn kórýge tamasha múmkindik alyp otyr. Kezinde ózi de Zarema partııasynda jarqyraı kórinip, synshylar baǵalaýy boıynsha sońǵy 30 jyldaǵy úzdik Zarema atanǵan balerınanyń umytylmas óner kórsetýi shyn máninde etalondyq sanalady jáne zamanymyzdyń jas balerınalaryna úlgi.
Altynaı Asylmuratova sheberliginen tálim alyp, shyńdalǵan bul jolǵy «Baqshasaraı burqaǵynda» myń burala bıleıtin talanttar ansamblinde de osaly joq. Atap aıtsaq, Gıreı hannyń rólinde Turlyhan Toıǵan sahnaǵa shyqsa, názik Marııanyń partııasyn Mádına Basbaeva oryndaıdy, qushtar Zaremany Anastasııa Zaklınskaıa tanystyrady. Vaslav – Danııar Jumataev, Nuralı – Serik Naqyspekovtiń saraptaýynda kórermenimen qaýyshady.
Reseılik teatrsúıer qaýym ártisterdiń oryndaýshylyq sheberligine ǵana emes, sondaı-aq kórnekti ıtalııalyq ssenograf Esıo Frıdjerıonyń qudiretti darynyna, «Oskar» syılyǵynyń ıegeri, kostıýmder boıynsha sýretshi Franka Skýarchapınonyń názik talǵamyna, jaryq jáne proeksııalar boıynsha sýretshiler Vınıcho Kelı men Serdjıo Metallı epti qoldana bilgen jańa tehnologııalarǵa baǵa bere alady. Polıak knıazi Potoskıı qamaly men han Gıreıdiń Baqshasaraıynyń saltanaty eshkimdi beıjaı qaldyrmasy anyq. Aıtýly kórinis jaı kenepte salynǵan sýret nemese «jumsaq dekorasııa» emes, bul oıyp jasalǵan taqtaımen ásemdelgen kádimgi baǵanalar, qabyrǵalar men kúmbezder. Sondyqtan da «Baqshasaraı burqaǵyndaǵy» atmosfera osy bir shynaıylyq hám ásemdigimen kórermenin baýrary sózsiz.
Aıta ketý kerek, bıyl Qazaqstan men Reseı arasyndaǵy dıplomatııalyq qarym-qatynastardyń 30 jyldyǵy atap ótilýde. «Astana Operanyń» Kreml saraıy sahnasyndaǵy bul gastrolin eki eldiń tabysty damyp kele jatqan mádenıetaralyq dıalogi dep baǵalaýǵa ábden laıyq.
