Aǵa býynnyń qoldaýy

«Sezdiń kún tártibinde Qazaq­stan Respýblıkasy Prezı­denttigine kandıdat usyný máse­lesi tur. Bizge búgingi syn-qaterge toly ýaqytta álemdik saıasattyń jaǵdaıyn jaqsy túsinetin, el múddesi úshin qajet kezde batyl sheshim qabyldap, kósh bas­taı alatyn saıası tulǵa qajet», degen «Ardagerler uıymy» RQB Ortalyq keńesiniń tóraǵasy Baqtyqoja Izmuhambetov elimiz úshin mańyzdy saıası naýqanǵa daıyndyq bastalǵanyn atap ótti.

– Qazirgi jaǵdaıdy geosaıa­sı ahýalǵa baılanysty qaras­tyratyn bolsaq, Prezıdenttiń ókilettiligin 7 jylǵa deıin uzar­týy durys sheshim ári batyl qadam dep sanaımyn. Kezekten tys saılaý ótkizý usynysyn da qoldaımyn. Elimizdiń bolashaǵy, balalarymyz ben nemerelerimiz úshin memlekette turaqtylyqtyń bolǵany mańyzdy. Sonymen bir­ge Memleket basshysynyń alǵa qoıǵan baǵdarlamalaryn oryndaý úshin 7 jyl óte qolaı­ly kezeń. Bul – prezıdent basta­ǵan reformalardy júzege asyrý­ǵa jetkilikti ýaqyt. Qasym-Jomart Toqaev kezekten tys saılaý ótkizýdi usyný arqy­ly el taǵdyryna úlken jaýap­ker­shilikpen qaraý mindetin qoıyp otyr. Elimizde bilimdi, kózi ashyq, ultjandy azamattar az emes. Prezıdenttikke kandıdat bolǵysy keletinder de árqashan tabylady. Másele bılikke umtylý­da emes, saıası salmaqta. Aldaǵy saılaý – bul jaı ǵana prezı­dentti tańdaý emes, jalpy Qazaq­stannyń halyqaralyq deń­geı­degi pozısııasy men ish­ki saıa­satynyń baǵyttaryn anyqtaý­ǵa baǵdarlanǵan saıası qadam bol­maq, – dep atap ótti Ar­da­gerler bir­lestiginiń tóraǵasy.

Sondaı-aq Baqtyqoja Izmu­ham­betov Qazaqstanda qabyl­dan­ǵan reformalardyń iske asýyn sóz etti.

– Sońǵy ýaqytta Memleket basshysynyń qabyldaǵan reformalary kóptiń kóńilinen shyǵyp jatqanyn ótken referendýmǵa halyqtyń belsendi qatysqanynan ańǵarýǵa bolady. Reformanyń joly eshqashan jeńil bolǵan emes. Elimiz jańa tarıhı kezeńge qadam basty. Prezıdent Ádiletti Qazaq­standy qurý jolynda túbe­geıli jáne jan-jaqty refor­malardy tabysty júzege asyrý úshin, halyqtyń jańa senim man­daty qajettigin, memleket múd­desin bárinen bıik qoıa­ty­nyn jáne kezekten tys pre­zı­dent saılaýyna barýǵa daıyn eke­nin aıtty. Prezıdent man­daty­nyń uzaqtyǵyn, qaıta saı­laný­ǵa tyıym salynatyn jetijyl­dyq bir merzimmen shekteýdi usyn­dy. Bul bolashaqta bılikti men­shiktep alýdyń kez kelgen əreketiniń aldyn alady. Osy refor­ma­lar oıdaǵydaı iske asqan sa­ıyn, el aza­mattarynyń əl-aýqaty kóterile túsedi. Memle­keti­­miz úshin mańyzdy saıası naý­qanǵa biz, arda­gerler úlken jaýap­ker­­­shi­lik­pen qaraýymyz kerek. Qazir­gi ýa­qytta Prezıdenttiń usynǵan re­for­malaryn qoldaý eli­mizdiń bo­la­shaǵy úshin asa ma­ńyzdy. Dú­nıe júzin jaılaǵan eko­­no­mıka­lyq qıyndyq biz­diń elimizdi de aınalyp ótken joq. Kórshileri­miz­de bolyp jat­qan shıelenister, salynǵan sank­sııalar, túrli shekteýler Qazaq­stannyń ekonomıkasyna da áser etpeı qoımaıdy. Sol sebepti Mem­leket basshysynyń saıasaty­na qoldaý kórsetip, qoǵam damýyn­daǵy ózgeristerdiń mán-jaıyn halyq arasynda túsindirý – arda­ger­lerdiń negizgi mindetiniń biri, – dedi ol.

Sezde óńirlerden kelgen Ardagerler keńesiniń ókilderi de sóz alyp, pikir bildirdi.

– Memleket basshysy halyq­qa úndeýinde, saılaý naýqa­ny­nyń qatań túrde zańǵa sáıkes, ádil ári ashyq ótetinine kepil­dik beretinin jarııalap, barsha azamat­tary­myzdyń jaýapkershilikti sezinip, demo­kratııa, zań jáne tártip qaǵı­­dattaryn berik ustaýǵa sha­qyr­­dy. Alaıda kezekten tys pre­­zıdent saılaýynyń ótetin kúni belgilengennen bastap el ara­syndaǵy rýhanı qundylyq­tary­myzdy óristetýdiń ornyna, arazdyq quraldaryn paıdalanyp, iritki salýshylar qarqyny beleń alýda. Qazir bel­gili bir toptar, olardyń jandaı­shap belsen­dileri, oblys orta­lyq­taryn aralap, jalań sózben, bos ýádemen keýdelerin soǵyp, kúni buryn men prezıdenttikke ótemin dep, baı­balam salyp júrgender de bar. Olardyń kópshiligi jeke basy­nyń soıylyn soǵyp, jeme-jemge kelgende jalǵan belsendi bolyp shyǵa keledi. Árıne, halyqtyń aq pen qaranyń jigin dál ajyrata biletinine senim mol, – dedi Aty­raý oblystyq ardagerler keńe­siniń tóraǵasy Murat О́teshov.

Al Almaty qalalyq ardagerler keńesiniń tóraǵasy Aqan Bı­janov Memleket bas­shy­sy­nyń Qazaqstan hal­q­yna Joldaýyn­daǵy «Azamat – bıznes – memleket» úsh­tigin qaıta qurý máselesine toq­taldy. «Bul úshtik baılanysta múmkindikter teńdigi men barlyǵyna ádildik ornatý mindeti tur. Sonymen qatar bul Joldaý azamattardyń ómir súrý deń­geıin arttyrýǵa baǵyt­talǵanyn atap ótkim keledi. Zeınet­aqynyń eń tómengi baza­lyq mólsherin kúnkóris deńgeıi­nen 70 paıyzǵa deıin, al eń joǵarǵy mólsherin 120 paıyzǵa deıin birtindep ulǵaıtý, sondaı-aq Prezıdenttiń «Ulttyq qor – balalarǵa» jańa baǵdarlamasyn daıyndaý jáne iske asyrý týraly bastamasy úlken áleý­mettik-ekonomıkalyq mańyzǵa ıe. Joldaý eldiń saıa­sı júıesin tolyq ózgertedi. Qoǵamdyq ıgilikterdiń joǵary deń­geıine jáne halyqtyń áleý­mettik osal toptaryna, sonyń ishinde zeınetkerlerge qoldaý kórsetýge kepil­dik berildi. Joldaý ekonomıka­lyq perspektıvalardy tek nyǵaı­tý ǵana emes, olardy keńeıtý­de áleýmettik ınstıtýttardy damytýǵa shaqyrady. Sondaı-aq Memleket basshysynyń osy jyly prezıdenttiń kezekten tys saılaýyn ótkizý, prezıdent mandatyn bir rettik jáne 7 jylmen shekteý týraly usynystaryn erekshe atap ótkim keledi. Bul usynys Prezıdenttiń demokratııa qaǵıdattaryn ustanýynyń, Qazaqstannyń turaqtylyǵy men ornyqty damýyn qamtamasyz etýdiń kórnekti úlgisi bolyp tabylady», dedi Aqan Bıjanov.

Ardagerlerdiń kezekten tys sezine 100-ge jýyq delegat qa­tys­ty. Olardyń barlyǵy alda­ǵy prezıdent saılaýyna úmitker retinde bir­aýyz­dan Qasym-Jomart Toqaev­tyń kandıdatýrasyn qoldady.