Jıyrma tórt jasynda KSRO halyq ártisi atanǵan talantty tulǵanyń týǵanyna bıyl 110 jyl tolyp otyr. Qazaq operasynyń negizin salýshylardyń biri, memlekettik syılyqtardyń laýreaty, kórnekti opera ánshisi, drama aktrısasy, qoǵam qaıratkeri Kúlásh Baıseıitovanyń ult tarıhyndaǵy joly erek. Bulbul ánshi bala kezinen-aq halyq ánderin tamasha oryndap, boıyndaǵy ártistik sheberligimen kózge túse bastapty. «Qazaqtyń bulbuly» atanǵan óner ıesiniń ǵumyry búginde ańyzǵa aınaldy.
Ol qazaqstandyq jáne sheteldik operada túrli obrazdy somdady, onyń ishinde Evgenıı Brýsılovskııdiń «Qyz Jibek» operasynda Jibektiń, Ahmet Jubanov pen Latıf Hamıdıdiń «Abaı» operasynda Ajar beınesin, Petr Chaıkovskııdiń «Evgenıı Onegın», Djakomo Pýchchınıdiń «Chıo-Chıo san» operasynda basty rólderdi oınady. Osy rólder arqyly Kúlásh Baıseıitova kórermenniń ystyq yqylasyna bólendi.
Ańyz-ǵumyrdyń mereıtoıyna arnalǵan «Bulbul» konsertiniń qarsanyńda Qazaq orkestriniń kórkemdik jetekshisi jáne bas dırıjeri, Qazaqstannyń eńbek sińirgen qaıratkeri Aıtqalı Jaıymovpen az-kem suhbattasqan edik.
«Qazaq orkestri jańa maýsymdy Kúlásh apamyzdyń 110 jyldyq mereıtoıyna arnalǵan keshpen ashty. Ol kisi dúıim jurtqa belgili, elimizdiń atyn asqaqtatqan, halyq maqtanyshyna aınalǵan qaıtalanbas daýys ıesi. Bulbul ánshi Kúlásh apamyz 1936 jyly qazaq mádenıetiniń on kúndigin ótkizý úshin elimizdiń ónerpazdarymen birge Máskeýge attanady. Onyń oryndaýshylyq sheberligi joǵary baǵalanyp, jeztańdaı ánshimiz kóptiń qoshemetine bólengen bolatyn. Konsertimizdi «Bulbul» dep ataýymyz beker emes, sebebi ásem úndi Kúlásh apamyz qalyń jurtshylyqqa «Bulbul» esimimen tanylǵan edi. Keıingi urpaq talantty óner ıesi esimin eshqashan umytpaıdy dep senemiz», deıdi bas dırıjer. Sondaı-aq ol talantty tulǵanyń repertýary keń ári baı ekenin atap ótti.
«Bir konsert baǵdarlamasynda barlyq repertýardy oryndaý múmkin emes. Kúlásh apamyz kúı anasy Dına shesheımen óte jaqsy qarym-qatynasta bolǵan. Sondyqtan Dınanyń «Ásem qońyr» kúıin engizip otyrmyz. Jambyl atanyń «Kúláshqa» áni, Evgenıı Brýsılovskııdiń «Qyz Jibek» operasynan «Gákký», Latıf Hamıdıdiń «Qazaq valsi» men «Bulbul», Muqan Tólebaevtyń «Birjan men Sara» operasynan aıtys, «Abaı» operasynan Ajar arııasy, «Qyz Jibek» operasynan «Shegeniń termesi» oryndalady. Odan bólek Kúlásh Baıseıitova Qurmanǵazy orkestrimen tyǵyz baılanysta boldy. Olar alǵashqy gastroldik saparlarǵa birge barǵan. Sony eskere otyryp, Qurmanǵazy babamyzdyń «Saryarqa» kúıimen konsertimizdi aıaqtaımyz», dedi Aıtqalı Jaıymov.
Aıta keteıik, konsertte Qazaqstannyń Eńbek sińirgen qaıratkerleri Araılym Rahymqyzy, Svetlana Aıtbaeva, Súndet Baıǵojın, Bıbigúl Januzaq, «Daryn» memlekettik jastar syılyǵynyń laýreaty Altynbek Ábilda, Halyqaralyq jáne respýblıkalyq baıqaýlardyń laýreattary Ferýza Rahmetova, Áıgerim Amanjolova, Áıgerim Oraz, Talǵat Allabırınov, Botagóz Táshimova óner kórsetti.
