«Keshe bizdiń partııanyń otyrysy ótti. Keńes músheleri kezekten tys prezıdenttik saılaýǵa «Aq jol» demokratııalyq partııasynyń qatysýy týraly usynys jasady», dedi partııa tóraǵasy Azat Perýashev.
Onyń aıtýynsha, bul másele boıynsha ázirge biraýyzdan sheshim joq.
«Biz bul másele boıynsha ortaq pikirge kele almadyq. Sezd durys sheshim qabyldaýǵa kómektesedi. Osy máseleni sizderdiń nazarlaryńyzǵa usynýdy jón kórdik. Bir partııa bola otyryp, bir kandıdatty tańdaý máselesin bárimiz sheshýimiz kerek dep esepteımin», dedi ol.
Úsh úmitkerdiń qatarynda jýrnalıst Sandýǵash Dúısenova, Májilis depýtaty Serik Erýbaev jáne «Aq jol» partııasynyń Aqtóbe oblystyq fılıalynyń tóraǵasy, kásipker Asqar Sadyqov bar.
«Sonymen qatar partııalyq keńeste keıbir áriptesterimiz qazirgi Prezıdentti qoldaýǵa usynys bildirdi. Mundaı pikirmen sanasý kerek», dep túıindedi sózin A.Perýashev.
