Sheberler sherýi

Kúz mezgili – sýretshiler, músin­shiler, sándik qoldan­baly óner sheber­leri úshin shy­ǵar­mashylyq shabyt keze­ńi. Jyl saıyn «Altyn alma» kórme-jármeńkesin uıym­das­tyratyn Or­talyq Mem­lekettik mýzeıdiń sol sheberdiń bárin de shaqyryp, Qazaqstan jáne Orta Azııa aýmaǵynda alma ıdeıasyn shırata túsetini quptarlyq dástúrge aınalǵan. Alma ıdeıa­sy – bir ǵana jemistiń tarıhy emes, kópqyrly talant ıeleri oǵan sheksiz maǵyna syıǵyzady. Natıýrmort pen peızaj, portret pen janrlyq kórinister, keskindeme, grafıka, fotosýretter men gobelen, bıser men batık sııaqty sándik óner týyndylarynda kórinis tapqan. Bir taqyrypty ár sýretshi ózin­she tarqatady, ár sheber ózinshe jyrlaıdy. Tanys ta­qy­ryptyń sheksiz qııalmen túr­lenip, dú­nıetanymǵa dara sıpatymen qozǵaý salatyn qasıeti kel­genderdiń tańdanysyn týdyrmaı qoımaıdy.

Kórmege Qazaqstannyń bar­lyq óńirinen, Qyrǵyzstan, О́zbekstan elderinen kelgen qol­óner sheberleri ózderiniń sándi, ásem buıymdary men káde­syılaryn, zergerlik buıymdar, dızaınerlik oıynshyqtar, ádemi quraq kórpesheler, kıizden jáne jibek matadan jasalǵan buıymdar men kıimder, sazdy aspaptar, shyǵys mınıatıýrasy, toqyma, teriden jasalǵan zattar, sandyqtar men kilemder usyndy.

Qol­danbaly óner týyndylaryn qyzyqtaǵandar bul zattardyń jasalý tehnıkasymen tanysyp qana qoımaı, jyldaǵy dástúr boıynsha sheberlik sabaqtary negizinde óz qoldarymen qyshtan qumyra jasap, kıiz basyp, sýret salyp, ártúrli kádesyı jasaýdyń ádis-tásilin úırenedi. Munyń eń paıdaly jaǵy, adam buryn baıqamaǵan, boıynda buǵyp jatqan beımálim qasıetin tanyp, qolónerdiń qandaı túrine beıimi bar ekenin bile alady. Kórme-jármeńkede Marat Sársebaev qysh jasaýdan, Aleksandra Volkova bısermen toqý óneri boıynsha sheberlik sabaǵyn ótkizgende, kelgenderdiń asa yqy­laspen nıet tanytqany son­dyqtan bolsa kerek.

Kórme-jármeńkeni uıymdas­tyrý­shylardyń basty maqsaty – Ortalyq Azııa halyqtarynyń materıaldyq mádenıetiniń alýan túr­liligin kórsetý bolsa, qala tur­ǵyn­dary men qonaqtary qolóner buıym­da­rynyń úzdik úlgilerimen tanysyp, dástúrli jármeńkeni aldaǵy jyly asyǵa kútetinin aıtyp tarqasty.

ALMATY